ކަރަންޓު ބޭނުން ކުރާ މިންވަރު އިތުރުވަމުން އަންނާތީ ކަރަންޓު އިގްތިޞާދު ކުރުމަށް ޚާއްސަ ސަމާލުކަމެއް ދިނުމަށް ސްޓެލްކޯއިން އިލްތިމާސްކޮށްފައެވެ.

އެކުންފުނިން އެކްސްގައި ކުރި ޕޯސްޓުގައި ބުނެފައި ވަނީ، މާލެ ސަރަހައްދުގައި ކަރަންޓް ބޭނުން ކުރާ މިންވަރު އިތުރުވެފައިވާ ކަމަށާއި އަދި ޚާއްޞަކޮށް ކޮންމެ ދުވަހަކުވެސް އެއްގަޑިތަކެއްގައި ކަރަންޓް ބޭނުންކުރާ މިންވަރު މަތިވާކަން އެކުންފުނިން ވަނީ ހާމަކޮށްފައެވެ.

ސްޓެލްކޯއިން ބުނީ މިރަމަޟާންމަހުގެ ފާއިތުވި ހަތްދުވަހަށް ބަލާއިރު އެންމެ ބޮޑަށް ކަރަންޓް ބޭނުން ކުރާ މިންވަރު ދަށްވަނީ، މެންދަމު 12އިން ފެށިގެން ހެނދުނު 7 އާއި ހަމައަށް ކަމަށެވެ. އަދި ކަރަންޓް ބޭނުންކުރާ މިންވަރު އެންމެ މަތިވެގެން ދަނީ މެންދުރު ފަހު 2 އިން އިރުއޮއްސި 6 ޖެހުމާއި ހަމައަށް ކަމަށާއި، ރޭގަނޑު 9އިން 11އަށްވެސް ކަރަންޓް ބޭނުން ކުރާ މިންވަރު މަތިވެގެންދާކަމުގައި ސްޓެލްކޯއިން ހާމަކުރައްވާފައިވެއެވެ.

ސްޓެލްކޯގެ ތަފާސް ހިސާބުތަކަށް ބަލާއިރު، މިރޯދަމަހުގެ ފުރަތަމަ 7 ދުވަހުގެ ތެރެއިން ކަރަންޓް ބޭނުންކުރި މިންވަރު އެންމެ މަތިވެފައި ވަނީ، ރޯދަމަހުގެ 6 ވީ ބުދަ ދުވަހުގައެވެ. އެދުވަހު ވަނީ 96.9 މެގަވޯޓާއި ހަމައަށް ކަރަންޓް ލޯޑު މަތިވެފައެވެ. ކަރަންޓް ބޭނުން ކުރި މިންވަރު އެންމެ ދަށްވެފައި ވަނީ ރޯދަމަހުގެ ފުރަތަމަ ދުވަހުގައެވެ. އެދުވަހު 78.0 މެގަވޯޓަށް ކަރަންޓް ލޯޑުދަށްވިއެވެ.

ސްޓެލްކޯއަށް މާލެ ސަރަހައްދަށް ކަރަންޓް ފޯރުކޮށް ދިނުމުގެ ކެޕޭސިޓީއަކީ 120 މެގަ ވޯޓެވެ.