ގެދޮރުވެރިޔާ ސްކީމުގެ ތެރެއިން ފްލެޓް ލިބޭނެ ކަމަށް ކުރީ ސަރުކާރުން އިއުލާނުކުރި 4000 މީހުންގެ ލިސްޓުގައި  ނުހިމެނޭ، 577 މީހަކު މިސަރުކާރުން ލިސްޓް ރިވިއުކޮށް އިއުލާނުކުރި އިރު އެލިސްޓުގައި ހިމަނާފައިވާ ކަމަށް އެމްޑީޕީން ބުނެފިއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އެމްޑީޕީ ސަރުކާރުގައި އިސްމަޤާމުތަކެއް ފުރުއްވި، އެމްޑީޕީގެ ޗެއާރޕަރސަންގެ ނާއިބު އިބްރާހީމް ވަހީދު (އިބުރޭ) ވިދާޅުވީ، މިސަރުކާރުން ފްލެޓް ލިބޭނެކަމަށް ކަނޑައަޅާފައިވާ 577 މީހުންނަކީ، ކުރީ ސަރުކާރުން އިޢުލާނުކުރި 4000 މީހުންގެ ލިސްޓުގައި ނުވެސް ނެތް މީހުންކަމަށެވެ. އޭގެ އިތުރުން، 56 މީހެއްގެ މާކްސް މަތިކޮށްގެން އެމީހުންނަށް ފްލެޓް ލިބޭނެކަމަށް ކަނޑައަޅައި ލިސްޓުގައި ހިމަނާފައިވާކަންވެސް އޭނާ ފާހަގަކުރެއްވިއެވެ.

ވަހީދު ވިދާޅުވީ، ރިވިއުކުރާނީ 4000 ފްލެޓް ދީފައިވާ މީހުންގެ ލިސްޓުކަމުގައިވެސް މިިނިސްޓަރ މުއްޠަލިބު އޮތީ ވިދާޅުވެފައި ކަމަށެވެ.

އިބްރާހީމް ވަހީދު ވިދާޅުވީ، ކުރީ ސަރުކާރުން ނެރުނު ލިސްޓާއި ކުޅެ ބަދަލު ގެނެސް މާކްސްވެސް ބަދަލުކޮށްފައި ވަނީ ކޮން ހަމަޔަކުންކަން އެނގެންވެސް ނެތް ކަމަށެވެ. 

އޭގެ އިތުރުން އިބްރާހީމް ވަހީދު ވަނީ، މިނިސްޓަރ ހައިދަރަކީ، ފްލެޓަށް ޝަރުޠުހަމަވާ މީހެއް ކަމުގައި ކަނޑައަޅާފައި އޮތީ ފްލެޓަށް ޝަރުޠުހަމަވާކަމަށް ބަލާފައިވާ 15751 މީހުންގެ ތެރޭގައި ކަމަށެވެ. އެހެން ނަމަވެސް ޑރ. ހައިދަރަށް ފްލެޓެއް ދޭން ކުރީ ސަރުކާރުން ހިމަނާފައި ނެތް ކަމަށާއި، ޝަރުޠުހަމަވާ އެހެން ނަމަވެސް ފްލެޓް ނުލިބޭ އެތައްހާސް ބަޔަކު ތިބި އިރު، ޑރ. ޢަލީ ހައިދަރުގެ ދެމަފިރި ކަނބަލުންނަށް ދޭން މިސަރުކާރުން ނިންމީ ކިހިނެއްތޯވެސް ސުވާލު އުފެދޭ ކަމުގައި އިބްރާހީމް ވަހީދު ވިދާޅުވެއެވެ.