އެންޓި-ކޮރަޕްޝަން ކޮމިޝަނުން ފަނޑިޔާރުންނާއި ގުޅޭ ޖިނާއީ ތަހުގީގެއް ހިންގަމުން ގެންދާކަމަށް ބުނެ، ޖުޑީޝަލް ސަރވިސް ކޮމިޝަނުން ފަނޑިޔާރުން ސަސްޕެންޑްކޮށްފައިވާއިރު، އޭސީސީން ބަލަމުން އަންނަ މައްސަލައަކީ ކޮބައިކަން ފަނޑިޔާރުންނަށްވެސް ނޭނގޭކަމުގައި، ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރުގެ ޤާނޫނީ ވަކީލުންގެ ޓީމުން ވިދާޅުވެއްޖެއެވެ.

އެކަމާއި ގުޅޭ ގޮތުން ފަނޑިޔާރު ޑރ. އަޒްމިރާލްދާ ޒާހިރުގެ ޤާނޫނީ ވަކީލުންގެ ޓީމުން ބުރާސްފަތި ދުވަހު ވަނީ ބަޔާނެއް ނެރެފައެވެ. އެބަޔާނުގައި ބުނެފައި ވަނީ، އޭސީސީން ފަނޑިޔާރު އަޒްމިރަލްދާއާ އާގުޅޭ މައްސަލައެއް ތަހުގީގު ކުރަމުންދާކަމަށް ބުނެ އެ ފަނޑިޔާރު ސަސްޕެންޑުކުރިތާ ހަފްތާއަކަށް ވުރެ ގިނަ ދުވަސްވީއިރު ވެސް އެ ކޮމިޝަނުން ފަނޑިޔާރުގެ މައްސަލައެއް ބަލަމުންދާ ކަމެއް ނުވަތަ އެއީ ކޮން ބާވަތެއްގެ ކުށަކާ ގުޅޭ މައްސަލައެއް ކަމެއް ވެސް އެއްވެސް ގޮތަކަށް އަންގާފައި ނުވާކަމަށެވެ. 

އެ ނޫސް ބަޔާނުގައި ބުނެފައި ވަނީ ފަނޑިޔާރު އަޒްމިރާލްދާ ސަސްޕެންޑުކޮށް، ހަމަ އެ ދުވަހުގެ ވަގުތެއްގައި އޭނާގެ ސުލޫކީ މައްސަލައެއް ބެލުމަށް ނިންމާފައިވާ ކަމަށް ޖުޑީޝަލް ސާވިސް ކޮމިޝަނުން އެންގިއިރު، އެ މައްސަލަތަކަކީ އަސްލެއް އަދި އަސާސެއް ނެތި ފަނޑިޔާރުންގެ މަސައްކަތާ ބެހި ނުފޫޒު ފޯރުވުމަށް އުފައްދާފައިވާ ހާލަތެއް ކަމަށެވެ. 

ހުސްވި ފެބުރުއަރީމަހުގެ 26 ވަނަ ދުވަހުގެ 11:00އަށް ސްޕްރީމްކޯޓުގައި ތާވަލުކޮށްފައި އޮތް އަޑުއެހުން ފަށަން ކުޑަވަގުތު ކޮޅަކަށް ވެފައި ވަނިކޮށް، ފަނޑިޔާރު ޑރ. އަޒްމިރާލްދާ ޒާހިރު އާއި، ފަނޑިޔާރު ހުސްނުއްސުއޫދާއި، ފަނޑިޔާރު، މަހާޒު ޢަލީ ޒާހިރު ސަސްޕެންޑް ކުރީ، ކޯޓުރޫމަށް ވެދެވަޑައިގަތުމަށް ތައްޔާރުވެގެން ކޯޓުގެ ސްޓޭޖުގެ ފަހަތުގައި ތިއްބަވަނިކޮށެވެ.

ސްޕްރީމްކޯޓުގެ ތިން ފަނޑިޔާރުން ސަސްޕެންޑްކޮށްފައި ވަނީ، ރައްޔިތުންގެ މަޖިލީހުގެ މެމްބަރުންގެ ގޮނޑި އެމެމްބަރުން ނިސްބަތްވާ ޕާޓީއަށް ގެއްލުވައި ލެވޭ ގޮތަށް ރައްޔިތުންގެ މަޖިލީހުން ޤާނޫނު އަސާސީއާ ޤާނޫނުތަކަށް ގެނައި އިސްލާޙްގެ މައްސަލަ އެކޯޓުގައި ކުރިޔަށްދާތީ، އެމައްސަލައަށް ނުފޫޒު ފޯރުވުމުގެ ގޮތުން ކަމުގައި އިދިކޮޅު ސިޔާސީ ޕާޓީތަކުން ވަނީ ތުހުމަތުކޮށްފައެވެ.