މިނިމުނު ފެބުރުއަރީމަހު ސްޓެލްކޯއިން ގޭބިސީތަކަށް ދެބިލެއް ފޮނުވާފައި ވަނީ ބެކްލޮގު ފިލުވައި، ރަމަޟާން މަހުގެ ކަރަންޓް ބިލަށް ޑިސްކައުންޓް ދިނުމަށް ކަމުގައި، ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވެއްޖެއެވެ.

ސްޓެލްކޯއިން ގާތްގާތުގައި ގޭބިސީތަކަށް ދެ ބިލް ފޮނުވުމާއި ގުޅިގެން އެކަމުގެ ކަންބޮޑުވުން އާއްމުން ވަނީ ފާޅުކޮށްފައެވެ. 

އެކަމާއި ގުޅިގެން ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވީ، އެއްމަހެއްގައި ދެކަރަންޓްބިލް ލިބުމުން އެކަމުގެ ޝަކުވާ ލިބެމުން އަންނާތީ ބިލްދެއްކުމަށް ދަތިވާ ފަރާތްތަކަށްވެސް ލުއި ގޮތްތައް އަބަދުވެސް އޮންނާނެ ކަމަށެވެ. އެގޮތުން ސްޓެލްކޯ ވެބްސައިޓް https://stelco.com.mv/rpex މެދުވެރިކޮށް ޕޭމަންޓް އެކްސްޓެންޝަނަށް އެދުމުގެ ފުރުސަތު ހުރިހާ ފަރާތްތަކަށް ވާނީ ހުޅުވާލެވިފައިކަމަށާއި، އެކަމުގައި އެމްޑީއަށް ނުވަތަ ސްޓެލްކޯގެ އެއްވެސް ވެރިއަކަށް ގުޅަން ނުޖެހޭނެ ކަމުގައިވެސް ފަހުމީ ވިދާޅުވިއެވެ.

ފަހުމީ ވިދާޅުވީ، އަބަދުވެސް ދަންނަވާ ވާހަކައަކީ ސްޓެލްކޯއަކީ ކަސްޓަމަރުންނާއި ގާތުން މަސައްކަތް ކުރާ ގައުމަށް އިހުލާސްތެރި އަދި މަސައްކަތުގެ އަހުލާގާއި ސުލޫކު ހިފަހައްޓައިގެން މަސައްކަތް ކުރާ މުވައްޒަފުންތަކެއް ތިބި ކުންފުންޏެއް ކަމަށެވެ. އަދި ސްޓެލްކޯއިން ރައްޔިތުންނަށް އޮޅުވައި ނުލާނެ ކަމަށާއި، އޮޅުވާލާނެ އެއްޗެއްވެސް ނޯންނާނެ ކަމުގައި ފަހުމީ ވަނީ ވިދާޅުވެފައެވެ.

ކަރަންޓް ބިލްތައް ބޮޑުވުމުގެ ޝަކުވާއަކީ އަބަދުވެސް ބޮޑުވެފައި އޮންނަ ޝަކުވާއެކެވެ. އެކަމާއި ގުޅިގެން އަބަދުވެސް ސްޓެލްކޯއަށް ފާޑުކިޔުންތައް އަމާޒުވެއެވެ.