ފަނޑިޔާރުންނަށް ރައީސުލްޖުމްހޫރިއްޔާ ނުފޫޒު ފޯރުއްވަވަމުން ގެންދަވާކަމުގައި ވިދާޅުވެ، ދިވެހިރާއްޖޭގެ ސުުޕްރީމްކޯޓުގެ ފަނޑިޔާރު އަލްއުސްތާޛު ޙުސްނުއްސުޢޫދު، ފަނޑިޔާރުކަމުގެ މަޤާމުން އިސްތިއުފާ ދެއްވައިފިއެވެ.

މަޤާމު އިސްތިޢުފާ ދެއްވައި ސުއޫދު ފޮނުއްވި ސިޓީގައި ވަނީ، ސިޔާސީ ޕާޓީތަކަށް، ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހުގެ ބާތިލް ކުރަން ސުޕްރީމް ކޯޓަށް ހުށަހަޅާފައި އޮތް މައްސަލައަށް ރައީސުލްޖުމްހޫރިއްޔާ ނުފޫޒު ފޯރުއްވެވުމަށް މަސައްކަތް ކުރައްވަމުން ގެންދަވާ ކަމަށެވެ.

ސުޢޫދުގެ ސިޓީގައި ވިދާޅުވީ، ދިވެހިރާއްޖޭގެ ސުޕްރީމް ކޯޓުގެ 3 ފަނޑިޔާރުން ސަސްޕެންޑުކޮށް، ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަށް ރައްޔިތުންގެ މަޖިލީހުން ބިލެއް ފާސްކޮށް، ދިވެހިރާއްޖޭގެ ސުޕްރީމް ކޯޓުގެ ހުރިހާ ފަނޑިޔާރުންނަށް ބިރު ދައްކައި ސުޕްރީމް ކޯޓަށް ހުށަހެޅިފައިވާ މައްސަލަ ރައީސުލްޖުމްހޫރިއްޔާ އެދިވަޑައިގަންނަވާގޮތަށް ނިންމުމަށް އެ މަނިކުފާނު ގާނޫނު އަސާސީގެ 141 ވަނަ މާއްދާގެ ނ އާއި ރ އާ ހިލާފަށް ފަނޑިޔާރުންނަށް ނުފޫޒު ފޯރުއްވަމުން ގެންދަވާތީވެ އެކަމާ އިހުތިޖާޖު ކުރުމުގެ ގޮތުން ފަނޑިޔާރުކަމުގެ މަޤާމުން އިސްތިއުފާ ދެއްވީ ކަމަށެވެ.

ސުޢޫދު އިސްތިއުފާ ދެއްވި އިރު، ސުޢޫދާއި އިތުރުން ސްޕްރީމްކޯޓުގެ ފަނޑިޔާރު، މަހާޒް އަލީ ޒާހިރާއި ޑރ. އައިޝަތު އަޒްމިރަލްދާ ޒާހިރު ވަނީ ޖޭއެސްސީން ސަސްޕެންޑްކޮށްފައެވެ. ތިން ފަނޑިޔާރުން ސަސްޕެންޑް ކުރީ އޭސީސީން ބަލަމުން އަންނަ މައްސަލައަކާއި ގުޅިގެން ކަމަށާއި، އަދި އެތިން ފަނޑިޔާރުންގެ ސްލޫކީ މައްސަލައެއްވެސް ބަލަމުން އަންނަ ކަމުގައި ޖުޑީޝަލް ސަރވިސް ކޮމިޝަނުން ވަނީ ވިދާޅުވެފައެވެ. އެހެން ނަމަވެސް އެމައްސަލަތަކަކީ ކޮބައިކަމެއް އޭސީސީއިންވެސް އަދި އެންޓި ކޮރަޕްޝަން ކޮމިޝަނުންވެސް ހާމަކޮށްފައެއް ނުވެއެވެ.

މިއަދު މަޤާމުން އިސްތިއުފާ ދެއްވި، އަލްއުސްތާޛު  ޙުސްނުއްސުޢޫދު ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމުގެ މަޤާމަށް ޢައްޔަން ކުރެވުނީ 08 ޑިސެންބަރު 2019 ގައެވެ.