ކުރިޔަށް އޮތް ރަމަޟާން މަހަށް ތައްޔާރުވުމުގެ ގޮތުން ސްޓެލްކޯއިން ކުރަމުން އަންނަ މަސައްކަތްތައް، މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ތޯރިގު އިބްރާހިމް ބައްލަވައި ލައްވައިފިއެވެ.

ސްޓެލްކޯއިން ހާމަކުރައްވާފައިވާ ގޮތުގައި، ގްރޭޓާމާލެ ސަރަހައްދުގެ ޕަވަރ ސެކިއުރިޓީގެ ބެކަޕްގެ ގޮތުގައި ގްރޭޓާމާލެ އިންޓަރކަނެކްޝަން ގްރިޑަށް އިތުރު ކުރާ 12 ޖަނަރޭޓަރުސެޓް ބެހެއްޓުމަށްޓަކައި އެކުންފުނިން ކުރަމުންގެންދާ މަސައްކަތްތައް ބައްލަވާލެއްވުމަށް މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ތޯރިގު އިބްރާހިމް ބުރާސްފަތި ދުވަހުގެރޭ ވަނީ ސައިޓަށް ޒިޔާރަތް ކުރައްވާފައެވެ. ސްޓެލްކޯއިން ކުރަމުން އަންނަ މަސައްކަތްތަކާއި ގުޅޭ ގޮތުން މިނިސްޓަރ ޠާރިޤަށް މައުލޫމާތު ދެެއްވީ ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީއެވެ.

މިނިސްޓަރ ޠާރިޤު ވަނީ ޕީކް ސީޒަނުގައި ކަރަންޓުގެ ހިދުމަތް މެދުކެނޑުމެއްނެތި ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާފައިވާ އިރުޝާދާއި އެއްގޮތަށް ސްޓެލްކޯއިން ކުރު މުއްދަތެއްގެ ތެރޭގައި ކުރަމުންގެންދާ މަސައްކަތްތަކަށް ސާބަސް ދަންނަވައި ކުންފުނީގެ ވެރިންނަށާއި މުވައްޒަފުންނަށް ޝުކުރު އަދާކުރައްވާފައި ކަމުގައި ސްޓެލްކޯއިން ވަނީ ހާމަކުރައްވާފައެވެ.

ކޮންމެ އަހަރަކުވެސް ރޯދަމަހަށް ތައްޔާރުވުމުގެ ގޮތުން ސްޓެލްކޯއިން ކަރަންޓް އުފައްދާ މިންވަރު މަތިކުރުމަށް ޚާއްޞަ މަސައްކަތްތަކެއް ކުރެއެވެ. މިއަހަރުގެ ރަމަޟާން މަސް ހޮނިހިރު ދުވަހު ފެށޭއިރު ސްޓެލްކޯއިން ވަނީ ކަރަންޓްގެ ޚިދުމަތް ދިނުމަށްޓަކައި އިތުރު ވަޞީލަތްތައް ޤާއިމްކޮށް އެކަމަށް ތައްޔާރުވެފައެވެ.