މިހާރު މާލެއަށް ކުރަމުންދާ ވިއްސާރައިގައި ފެންބޮޑުވުމުގެ ސަބަބުން ރައްޔިތުންނަށް ލިބިދާނެ ގެއްލުމަކުން ރައްކާތެރިކުރުމަށްޓަކައި، ފެން ހިންދުމަށާއި ވެލިބަސްތާތައް ޖެހުމުގެ މަސައްކަތް ފުލުހުންނާއި ސިފައިންނާއި އަދި ސަރުކާރުގެ އެހެން މުއައްސަސާތައް ގުޅިގެން ފަށައިފިއެވެ.

އިރު އޮއްސުނުފަހުން މާލެއަށް ވެހެމުންދާ ބޯވާރޭގެ ސަބަބުން މާލޭގެ މަގުތަކުގައި ވަނީ ވަރަށް ބޮޑަށް ފެންބޮޑުވެފައެވެ. އަދި ގޭގެއަށާއި ފިހާރަތަކަށް ފެންވަދެ ގެއްލުންތައް ލިބެމުންދިޔުމާއިއެކު ސިފައިންނާއި ފުލުހުން ގެންދަނީ ފެން ހިންދުމުގެ މަސައްކަތް ކުރަމުންނެވެ. މިގޮތުން މާލޭގެ 13 ސަރަހައްދެއްގައި ޕަމްޕްތައް ބަހައްޓައިގެން ފެން ހިންދުމުގެ މަސައްކަތް ސިފައިން ދަނީ ކުރަމުންނެވެ.

ބޯވިއްސާރައިގެ ސަބަބުން، ހޮސްޕިޓަލުތަކުން ގެއަށް ނުދެވިފައި ތިބި މީހުން ގޭގެއަށް އުފުލައިދިނުމާއި، ފިހާރަތަކާއި ގޭގޭގައި ވެލިބަސްތާތައް ޖަހައި ދިނުމުގެ މަސައްކަތް ފުލުހުން އަންނަނީ ކުރަމުންނެވެ. ވެލިބަސްތާތައް ޖެހުމުގައި، ހޯމްމިނިސްޓަރ ޢަލީ އިޙްސާނާއި ކޮމިޝަނަރ އޮފް ޕޮލިސް ޢަލީ ޝުޖާޢުވެސް ވަނީ އަމަލީ ގޮތުން މަސައްކަތް ކުރައްވާފައެވެ. ވިއްސާރަ އާއި ގުޅިގެން އެހީތެރިކަން ބޭނުންވާ ފަރާތްތަކުން 911އަށް ގުޅުމަށްވެސް ފުލުހުންގެ އިދާރާއިން ވަނީ އިލްތިމާސްކޮށްފައެވެ.

މާލޭގެ އިތުރުން މާލެ އަތޮޅުގެ ބައެއް ރަށްރަށުގައިވެސް ވަނީ ފެންބޮޑުވެފައެެވެ.