ރޯދަމަހުގެ ކަރަންޓް ބިލުން ސްޓްލެކޯގެ ހުރިހާ ޑޮމެސްޓިކް ކަސްޓަމަރުންނަށްވެސް މަދުވެގެން %10 ޑިސްކައުންޓެއް ލިބޭނެ ކަމަށް ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވެއްޖެއެވެ.

ފަޙްމީ މިހެން ވިދާޅުވީ، ރޯދަ މަހުގެ ކަރަންޓާއި ފެނުގެ ބިލްތަކުން ޑިސްކައުންޓް ދޭގޮތް ތަފްސީލްކޮށްދެއްވައި އެކްސްގައި ކުރެއްވި ޕޯސްޓެއްގައެވެ.

ފަޙްމީ ވިދާޅުވީ، ސްޓެލްކޯއިން ޑިސްކައުންޓް ދޭނީ، ރައީސުލް ޖުމްހޫރިއްޔާ ޑރ. މުހައްމަދު މުއިއްޒު އަންގަވާފައިވާ ގޮތަށް ރައްޔިތުންނަށް ޚަރަދުކުޑަ އަދި އެންމެ ލުއި ފަސޭހަ ވާނޭ ގޮތަށް ކަމަށެވެ. މިގޮތުން ޑިސްކައުންޓް ދެވޭނީ ބިލްތަކުގެ އެވްރެޖަށް ބަލައިގެން ކަމުގައިވެސް ވިދާޅުވިއެވެ.

ފަހުމީ ވިދާޅުވީ، އާއްމު މަސްތަކުގަ ކަރަންޓް ބޭނުންކުރާ އެވްރެޖަށްވުރެ މިރޯދަމަހު ކަރަންޓް ބޭނުންކުރާ މިންވަރު ދަށްވިއަސް އެފަދަ ފަރާތްތަކަށްވެސް %10 ގެ ޑިސްކައުންޓް ލިބޭނެ ކަމަށެވެ. މީގެ އިތުރުން 9 މަސް ދުވަހުގެ އެވްރެޖް ނެގެން ނެތް ތަންތަނަށްވެސް %10 ޑިސްކައުންޓު ލިބިގެންދާނެކަމަށާއި، ޖުމުލަ ގޮތެއްގައި އެންމެ މަދުވެގެން %10 ނުލިބޭ އެއްވެސް ޑޮމެސްޓިކް ކަސްޓަމަރެއް ނުހުންނާނެ ކަމުގައިވެސް ފަޙްމީ ވިދާޅުވިއެވެ.

މިދިޔަ އަހަރުގެ ރޯދަމަހުގައިވެސް ސަރުކާރުން ވަނީ ކަރަންޓުން އާއްމު ގޭބިސީތަކަށް %10ގެ ޑިސްކައުންޓެއް ދެއްވާފައެވެ.