މިސަރުކާރުގައި އަމަލީ މަސައްކަތްފެށި މަޝްރޫޢުތަކުގެ ތެރެއިން ނިމުނު ފުރަތަމަ މަޝްރޫޢު، އިއްޒުއްދީން ފާލަން އަލުން ބިނާކުރުމުގެ މަސައްކަތް ނިންމައި މިރޭ ހުޅުވައިފިއެވެ.

މި ފާލަން ހުޅުއްވައި ދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. އެމަނިކުފާނު ފާލަން ހުޅުއްވައި ދެއްވައި ދެއްކެވި ވާހަކަފުޅުގައި، މި ފާލަމަކީ ސަރުކާރުގެ ޤައުމީ ތަރައްޤީގެ ސިޔާސަތާ ވަރަށް ބޮޑަށް ގުޅި ލާމެހިފައިވާ ގޮތަށް ފަރުމާކުރެވިފައިވާ ފާލަމެއްކަމުގައި ވަނީ ވިދާޅުވެފައެވެ.

ރައީސުލްޖުމްހޫރިއްޔާގެ ވާހަކަފުޅުގައި، އެމަނިކުފާނު ތަރައްޤީ މާނަ ކުރައްވަނީ ވަށާޖެހޭ ތަރައްޤީއެއް ގޮތަށް، ޢުމްރާނީ ބިނާކުރުންތަކާއެކު ފިކުރީ ބިނާކުރުން ހިމެނޭ ގޮތަށް ކަމުގައި ވަނީ ވިދާޅުވެފައެވެ. އަދި ފިކުރީ ބިނާކުރުމުގެ ތެރޭގައި، ތިމާގެ ވިސްނުމުގައި ޤައުމިއްޔަތު ދިރުވައި އާލާކުރުމުގެ ފިކުރު ބިނާކުރުން ހިމެނޭކަން ފާހަގަކުރައްވަމުން، މިފާލަމުންވެސް ދިވެހިވަންތަކަމާއި، ދިވެހިރާއްޖޭގެ ފަންނުވެރިކަމާއި، ރާއްޖޭގެ މާޒީ އަދި މުސްތަޤްބަލްވެސް ރަމްޒުކޮށްދޭނެ ކަމުގައިވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ޢިއްޒުއްދީން ފާލަން ތަރައްޤީކުރެއްވި އެންމެ މުހިންމު އެއްބޭނުންފުޅަކީ އެ ސަރަހައްދަކީ ހިތްގައިމު މައިދާނަކަށް ހެއްދެވުން ކަމުގައި ވިދާޅުވިއެވެ. އަދި ސަލްޓަން ޕާކްވެސް މިދިޔަ ދެތިން އަހަރުގެ ތެރޭގައި އޮތީ އެއްގޮތަކަށްވެސް ނުބެލެހެއްޓިކަން ފާހަގަކުރައްވައި، އެޕާކުވެސް ސަރުކާރުން ތަރައްޤީކުރެއްވުމަށް ނިންމަވާފައިވާ ކަމުގައި ވިދާޅުވިއެވެ.