ފުލުހުންގެ ކުންފުނި، ޕޮލްކޯގެ ސީއީއޯގެ މަޤާމުގައި ހުންނެވި، އިންސްޕެކްޓަރ އޮފް ޕޮލިސް އަޙްމަދު އަނީސް މަޤާމުގެ ޒިންމާތަކުން އެކަހެރިކޮށްފިއެވެ.

ފުލުހުންގެ އިދާރާއިން މީޑިއާތަކަށް ފޮނުވި މެސެޖުގައި ވިދާޅުވީ، އެގޮތަށް ނިންމާފައި ވަނީ ޕޮލްކޯގެ ބޯޑުން، މިމަހުގެ 23 ވަނަ ދުވަހުގައި ކަމަށެވެ. އަދި އަނީސް ސަސްޕެންޑްކުރުމަށް ބޯޑުން ނިންމީ، އޭނާ އާއި މެދު ޢިތުބާރު ނެތްކަމުގެ މައްސަލައެއް ޕޮލްކޯގެ ބޯޑަށް ހުށައެޅިފައި ވާތީ ކަމުގައިވެސް ފުލުހުންގެ އިދާރާއިން މީޑިއާތަކަށް ފޮނުވި މެސެޖުގައި ވިދާޅުވެފައި ވެއެވެ.

ފުލުުހުންގެ އިދާރާއިން ވިދާޅުވީ، އަނީސް ސަސްޕެންޑް ކުރުމަށްފަހުގައި، ޕޮލްކޯގެ ކަންކަން ދުވަހުން ދުވަހަށް ހިންގުމުގެ ޒިންމާ، ޕޮލްކޯގެ ސެކްރެޓަރީ އިބްރާހިމް ޚަލީލުއާވެސް ހަވާލުކުރުމަށް ޕޮލސްކޯގެ ބޯޑުން ނިންމާފައިވާ ކަމަށެވެ.

އަނީސް ސަސްޕެންޑް ކުރި ސަބަބަކާއި ގުޅޭ ގޮތުން ނޫސްވެރިން ކުރި ސުވާލުތަކަށް ފުލުހުން ޖަވާބެއް ނުދިނެވެ. އެހެން ނަމަވެސް އަނީސް ސަސްޕެންޑް ކުރުމަށް ނިންމީ، ޕޮލްކޯގެ ތެރޭގައި ހިނގާގޮސްފައިވާ ޚިޔާނާތުގެ މައްސަލަތައް ބެލުމަށް، އޭސީސީއަށް އޭނާ އެއްބާރުލުން ދެމުންދާތީކަމަށް ބައެއް ފަރާތްތަކުން ތުހުމަތުކޮށްފައިވެއެވެ. އަދި ޕޮލްކޯގެ ބޯޑުގެ ނިންމުމެއް ކަމަށް ބުނާ އެ ނިންމުމަކީ، ޕޮލްކޯގެ ބޯޑުގެ ހިންގާ ޤަވާއިދާއި ޚިލާފަށް ނިންމި ނިންމުމެއް ކަމުގައިވެސް ބައެއް ފަރާތްތަކުން ވަނީ ބުނެފައެވެ.