ދިވެހިރާއްޖޭގައި ޢަދްލު އިންޞާފް ޤާއިމުކުރުމުގެ އެންމެ މަތީ ކޯޓުކަމުގައިވާ ސުޕްރީމްކޯޓުގައި ހިމެނޭ ފަނޑިޔާރުންގެ ޢަދަދަށް ބަދަލުގެނައުމަށް ރައްޔިތުންގެ މަޖިލހަށް ހުށަހަޅާފައިވާ ކަމަށް ބުނެވޭ ބިލަކީ، ޢަދްލު އިންޞާފް ޤާއިމުކުރުމުގެ ނިޒާމުގެ މުސްތަޤިއްލުކަން ނިގުޅައިގަނެ، ފަނޑިޔާރުންނަށް ނޭދެވޭ ނުފޫޒު ފޯރުވުމަށް ހިންގޭ ޣައިރު ދުސްތޫރީ ޢަމަލެއް ކަމުގައި ކުރީގެ އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައްޔިތުންގެ މަޖިލީހަށް މިހާރު ހުށައަޅާފައިވާ، ކޯޓުތަކުގެ ޤާނޫނަށް އިސްލާޙް ގެނައުމުގެ ބިލާއި ގުޅޭ ގޮތުން، އެކްސްގައި ލިޔުއްވި ދިގު ޕޯސްޓެއްގައެވެ.

މިގޮތުން، ޚާއްޞަކޮށް ސުޕްރީމް ކޯޓުން ޢާންމު މަޞްލަޙަތާ ގުޅިފައިވާ ދުސްތޫރީ މައްސަލައެއް ބަލަމުން ދާ ދަނޑިވަޅެއްގައި، ކޯޓަށް ނުފޫޒުފޯރާ ފަދަ އެއްވެސް ޢަމަލެއް އެއްވެސް ފަރާތަކުން ކުރާނަމަ، އެއީ ދުސްތޫރީގޮތުން ޞައްޙަ ޢަމަލެއް ކަމުގައި ނުބެލެވޭނެކަމުގައިވެސް ކުރީގެ އުއްތަމަ ފަނޑިޔާރު ވިދާޅުވިއެވެ. މީގެ އިތުރުން އެއީ، ދިވެހި ރާއްޖޭގައި ޤާއިމުވެފައިވާ، ސުޕްރީމް ކޯޓުގެ ފަނޑިޔާރުންގެ ޢަދަދު އިރުއިރުކޮޅާ ބަދަލުކުރުމުގެ މި ޘަޤާފަތަކީ ތަހްޒީބު މުޖްތަމަޢެއްގައި ބަލައިގަނެވިގެންވާނެ ކަމެއް ނޫން ކަމުގައިވެސް އެމަނިކުފާނު ވިދާޅުވިއެވެ.

ކުރީގެ އުއްތަމަ ފަނޑިޔާރު ވަނީ، 2014 ވަނަ އަހަރު، އޭރުގެ ސްޕްރީމްކޯޓުގެ ފަނޑިޔާރުންގެ ބެންޗަށް ބަދަލު ގެނައިގޮތުގެ މައްޗަށާއި އެކަމުގައި ކުރެއްވުނު ތަޖުރިބާތަކުގެ މައްޗަށްވެސް އަލިއަޅުއްވާލައްވާފައެވެ.