ރޯދަ ހަދިޔާގެ ގޮތުގައި ބަހާ މަސްދަޅު ކޭސްތައް މާލެ ސަރަހައްދުގެ ގޭބިސީތަކަށް ހަވާލުކުރުމުގެ މަސައްކަތް މާލޭ ސިޓީ ކައުންސިލާއި ހަވާލުނުކޮށް، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއާ ހަވާލުކޮށްފައިވާ ކަމުގައި މާލޭ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

އާޒިމް ކުރެއްވި ޕޯސްޓެއްގައި ވިދާޅުވީ، ‏މާލޭގެ ރައްޔިތުންނަށް ރޯދަ ހަދިޔާގެ ގޮތުގައި ދޫކުރުމަށް ހަމަޖެހިފައިވާ މަސްދަޅު، ބެހުމުގެ މަސައްކަތް ކުރިއަށް ގެންދިއުމަށް ހަވާލުވެފައިވަނީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއިންކަމަށް އެސްޓީއޯއިން މިއަދު ވަނީ އެކައުންސިލަށް އަންގަވާފައި ކަަމަށެވެ. އެހެންކަމުން، މަސްދަޅު ބެހުމަށް ކުރިން ސިޓީ ކައުންސިލުން ހަމަޖައްސައި އިއުލާނުކޮށްފައިވާ ތަންތަނަށް ބަދަލުއަތުވެދާނެ ކަމުގައި އާޒިމް ވިދާޅުވިއެވެ.

އާޒިމް އިތުރަށް ވިދާޅުވީ، އެކަމާއި ގުޅޭގޮތުން އިތުރު މަޢުލޫމާތު މި އިދާރާއަށް ލިބޭ މިންވަރަކުން ރައްޔިތުންނާ ހަމައަށް ފޯރުކޮށްދެމުން ގެންދާނެ ވާހަކަ ދަންނަވަމެވެ.

އެސްޓީއޯއިން ހާމަކޮށްފައިވާ ގޮތުގައި މަސްދަޅު ކޭސް އާއްމުންނަށް ބަހާނީ، މިރެއިން ފެށިގެން މިމަހުގެ 27 ވަނަ ދުވަހުގެ ނިޔަލަށެވެ. ރޯދަ ހަދިޔާގެ ގޮތުގައި ކޮންމެ ގޭބިސީއަކަށްވެސް ދޫކުރަން ހަމަޖައްސާފައި ވަނީ، 180 ގްރާމްގެ 48 ދަޅުގެ ތެޔޮމަސް ކޭހެކެވެ. 

މާލެ ސަރަހައްދުގައި މަސްދަޅު ކޭސްތައް ބެހުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއާ ހަވާލުކުރި އިރު އަތޮޅުތަކުގައި މަސްދަޅު ކޭސްތައް ބެހުން ކުރިޔަށް ގެންދަނީ ކައުންސިލްތައް މެދުވެރިކޮށެވެ.