މިއަހަރު ހަރަށެއްގައި އަލަށް ޢިމާރާތް ކުރުމަށް ހަމަޖައްސާފައިވާ މިސްކިތްތައް ހުންނާނެ ގޮތުގެ ކުރެހުންތައް މިނިސްޓްރީ އޮފް އިސްލާމިކް އެފެއާޒުން އާއްމު ކުރައްވައިފިއެވެ.

އެމިނިސްޓްރީން ވިދާޅުވީ، ރައީސުލްޖުމުހޫރިއްޔާ ޑރ މުޙައްމަދު މުޢިއްޒުގެ ވައުދާ އެއް ގޮތަށް އއ. ރަސްދޫ، އދ. ފެންފުށި، ފ. ފީއަލި، ގދ. މަޑަވެލި، ހ.އ ބާރަށް، ތ. ވޭމަންޑޫގައި މިއަހަރު އިމާރާތްކުރާ މި މިސްކިތްތަށް ނިމޭއިރު، ސޯލާއާއި އޭސީ ވެސް ހަރުކުރެވި، ނެވިލޯން ވެސް އަޅާނެކަމަށެވެ. 

އަދި މިމިސްކިތްތަކުގެ ތެރޭގައި ހިމެނެނީ ތިން ސައިޒެއްގެ މިސްކިތް ކަމަށާއި އެއީ 300، 500، 700 މީހުންނަށް ނަމާދުކުރެވޭނެ 3 ސައިޒްގެ މިސްކިތް ކަމުގައިވެސް އެމިނިސްޓްރީން ވިދާޅުވިއެވެ. 

މިސްކިތްތަށް ޑިޒައިން ކުރެވިފައިވާނީ ކޮންމެ މިސްކިތެއްގައި ވެސް ޤުރުއާން ކިޔަވައިދެވޭ ގޮތަށް ކްލާސް ރޫމާއެކުގައި ކަމަށާއި، މި މަޝްރޫޢުތަކަކީ ސަރުކާރުގެ ޚަރަދުގައި ކުރިއަށް ގެންދެވޭ މަޝްރޫޢުތަކެއް ކަމުގައިވެސް އެމިނިސްޓްރީން ވިދާޅުވިއެވެ. މި މިސްކިތްތައް ކުރަހާފައިވަނީ ރިޔަން އިން ކަމަށާއި، މިއީ ރާއްޖޭގެ ތާރީޚާއި ސަޤާފަތާއި މާޙައުލާއި ގުޅޭގޮތައް ޑިޒައިންކުރެވިފައިވާ މިސްކިތްތަކެއް ކަމުގައިވެސް މިނިސްޓްރީ އޮފް އިސްލާމިކް އެފެއާޒުން ވަނީ ވިދާޅުވެފައެވެ.

އިސްލާމިކް މިނިސްޓްރީން ވިދާޅުވީ، މި މިސްކިތްތައް ޢިމާރާތް ކުރުމުގެ މަޝްރޫޢުތަކުގެ ޢަމަލީ މަސައްކަތްތައް ރޯދައިގެ ފަހުން ފެށިގެންދާނެ ކަމަށެވެ.