ޕާޓީތަކުން ނިންމައިގެން ރައްޔިތުންގެ މަޖިީހުގެ މެމްބަރުންގެ ގޮނޑި ގެއްލުވައި ލެވޭ ގޮތަށް ޤާނޫނު އަސާސިއަށް ގެނައި އިސްލާޙް ބާޠިލް ކުރަން ސްޕްރީމް ކޯޓަށް ހުށައެޅި މައްސަލަ ކުރިޔަށް ގެންދެވޭނެ ކަމަށް ކަނޑައަޅައި އެމައްސަލައިގައި ޖަވާބުދާރީވާން ދައުލަތަށް 10 ދުވަހުގެ މުހުލަތެއްދީފިއެވެ.

މިމައްސަލަ ސްޕްރީމްކޯޓަށް ހުށައެޅުއްވީ ޤާނޫނީ ވަކީލު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީީގެ މެމްބަރު ޢަލީ ޙުސައިނެވެ.

ޢަލީ ޙުސައިން ހުށައެޅުއްވި މައްސަލައިގައި ވިދާޅުވެފައި ވަނީ، ޤާނޫނު އަސާސީއަށް ގެނެސްފައިވާ 6 ވަނަ އިސްލާޙް ޤާނޫނު އަސާސީ އާއި ޤާނޫނުތަކާއި ޚިލާފު ކަމަށެވެ. މިގޮތުން އެއިސްލާޙް ޤާނޫނު އަސާސީގެ 26 ވަނަ މާއްދާ އާއި، ގާނޫނުއަސާސީގެ 75 ވަނަ މާއްދާ އާއި، 90 ވަނަ މާއްދާއާ ވެސް ފުށުއަރާ ކަމަށްވެސް ޢަލީ ޙުސައިން ހުށައެޅުއްވި މައްސަލައިގައި ފާހަގަކުރައްވާފައި ވެއެވެ.

މިމައްސަލައިގައި އިއްޔެ އާއި މިއަދު ކުރިޔަށް ދިޔައީ މައްސަލަ ބަލައިގަތުމާއި ގުޅޭ ގޮތުން ބޭއްވި އަޑުއެހުންތަކެވެ. މިއަދުގެ އަޑުއެހުމުގައި ސްޕްރީމްކޯޓުން ނިންމާފައި ވަނީ، އެމައްސަލަ ކުރިއަށްގެންދިޔުމަށާއި އެ މައްސަލާގައި ހުށަހެޅި އިޖުރާއީ އިއުތިރާޒާ މެދު ފަނޑިޔާރުން ދެކޭ ގޮތް މައްސަލައިގެ ނިންމުމުގައި ހިމެނުމަށެވެ.

މިމައްސަލައިގައި ރާއްޖޭގެ ފުންނާބު އުސް ޤާނޫނީ ވަކީލުންގެ މެދުގައިވެސް ވަނީ ބަހުސް އުފެދިފައެވެ. އަދި މިމައްސަލަގައި ދިވެހިރާއްޖޭގެ ސްޕްރީމްކޯޓުން ގޮތެއް ނިންމިދާނެތޯވެސް އެބޭފުޅުން ސުވާލު އުފައްދަވައެވެ.

ޤާނޫނު އަސާސީއަށް ގެނަައި އިސްލާޙްގެ މައްސަލަ ސްޕްރީމްކޯޓުގައި ކުރިޔަށް ނުގެންދެވޭނެ ކަމަށް ދައުލަތުން ސުޕްރީމްކޯޓުގައި ބުނި ނަމަވެސް އެކަމަށް ޗެލެންޖްކޮށް ފަނޑިޔާރުންގެ މަޖިލީހުން ކުރެއްވި ސުވާލުތަކަށް ދައުލަތުގެ ވަކީލުންނަށް ޖަވާބެއް ނުދެވުނެވެ.

މިމައްސައިގެ އަޑުއެހުމެއް ދެން ބާއްވާނީ، މައްސަލައިގައި ދައުލަތުން ޖަވާބުދާރީވުމަށް ދީފައިވާ 10 ދުވަހުގެ މުއްދަތުގެ ފަހުންނެވެ.