ރަސްފަންނު މޫދުގައި ކިސަޑު ގިނަވުމުގެ ސަބަބުން، އެ ތަން ސާފުކުރުމަށް މޫދައެރުން މަނާކޮށް ބަންދުކޮށްފިއެވެ.

ރަސްފަންނަކީ، ދޮށީ އުމުރުގެ ގިނަ މީހުން މޫދު ކަސްރަތަށްވެސް ބޭނުން ކުރަމުން އައި ތަނެކެވެ.

މާލޭ ސިޓީ ކައުންސިލުން ހާމަކޮށްފައިވާ ގޮތުގައި ރަސްފަނުގެ މޫދުގައި ގާތްގަނޑަކަށް 1 ފޫޓަށް ވަނީ ކިސަޑު ބޯވެފައެވެ. އެހެންވެ މިއަދު ހެނދުނު 9:00 އިން ފެށިގެން ރަސްފަނު ބަންދުކޮށްފައި ވަނީ މޫދުން ކިސަޑު ނެގުމަށާއި، އަލުން ގޮނޑުދޮށަށް ވެލިއަޅައި ރީތި ކުރުމަށެވެ.

ރަސްފަނުގެ ލޮނުގަނޑުގެ ތެރޭގައި ކިސަޑު ބޯވުމުގެ މައްސަލަ ކުރިމަތިވަމުން އަންނަނީ އެތަން ހަދާފައިވާ ގޮތުން އެކަށީގެންވާ ގޮތެއްގައި، ލޮނުގަނޑު ދައުރު ނުކުރާތީ ކަމުގައި ތަޖުރިބާކާރުން ވިދާޅުވެއެވެ.

މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައުސިން މިނިސްޓަރު ކަމުގައި ހުންނެވި ދުވަސްވަރު ރަސްފަންނު ތަރައްޤީ ކުރަމުން ދިޔައިރުވެސް އެކަމަށް ވަރަށް ބޮޑެތި ފާޑު ކިޔުންތަކެއް އަމާޒުވެގެން ދިޔައެވެ.