ބްރޯޑްކާސްޓިން ކޮމިޝަންގެ މެންބަރުކަމަށް ރައީސުލްޖުމްހޫރިއްޔާ ދާދި ފަހުން ޢައްޔަނު ކުރެއްވި، ކޮމޭޑިއަން އަދި ކުރީގެ މަޖިލިސް މެމްބަރު މުޙައްމަދު ޢަބްދުﷲ މުޙައްމާ 11 އަހަރުވާންދެން މަހަކު 83000ރ ބޭންކަން ދައްކަން އަންގައި ސިވިލްކޯޓުން ޙުކުމްކޮށްފިއެވެ.

މުޙައްމާގެ މައްޗަށް މިޙުކުމް އިއްވާފައި ވަނީ ސިވިލްމޯޓުން މިދިޔަ ބުރާސްފަތި ދުވަހުގައެވެ. އޭނާގެ މައްޗަށް މިޙުކުމް އިއްވާފައި ވަނީ، ބޭންކް އޮފް މޯލްޑިވްސް (ބީއެމްއެލް)އިން އޭނާ ނަގާފައިވާ، ލޯނަކަށް ނުދައްކާ އޮތް 5.2 މިލިއަން ރުފިޔާ ހޯދުމަށް ބޭންކުން ސިވިލްކޯޓުގައި ކޮށްފައިވާ ދައުވާ އާއި ގުޅިގެންނެވެ. 

ބޭންކުން އެދިފައިވަނީ، ލޯނު ދައްކަމުން ނުދާނީ، އެލޯނު ނެގުމަށް ރަހުނުކޮށްފައި އޮތް، ހ. ފުރާތު ނަމަކަށް ކިޔާގެ ވިއްކާލުމަށެވެ. އެހެން ނަމަވެސް ލޯނު ފައިސާ ދެއްކުމަށް މުހައްމާ އެއްބަސްވާތީ ކޯޓުން ނިންމާފައި ވަނީ، ރަހުނު ވިއްކާލުމަށް ހުއްދަ ދިނުމުގެ ބަދަލުގައި މަދުވެގެން 83000ރ ކޮންމެ މަހަކުވެސް ބޭންކަށް ދައްކަމުން ގޮސް 2036 ވަނަ އަހަރުގެ މެއި މަހުގެ ނިޔަަލަށް ލޯނު ދައްކައި ޚަލާސް ކުރުމަށެވެ.

ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު ކަމުގެ މަޤާމުވެސް ފުރުއްވި މުޙައްމަދު ޢަބުދުއްﷲ (މުހައްމާ) އާއްމުންގެ މެދުގައި ބޮޑަށް މަޝްހޫރުވެފައި ވަނީ ކޮމޭޑިއަން އެއްގެ ގޮތުގައެވެ.