Advertisement
ރަސްފަންނު -- ފޮޓޯ: މާލޭ ސިޓީ ކައުންސިލް
ރަސްފަންނާއި ސަލްޓަންޕާކުގެ ހާލަތާއި މެދު ހިތާމަކުަރައްވާ ކަމުގައި ރައީސް ވިދާޅުވެއްޖެ
ރަސްފަންނާއި ސަލްޓަންޕާކް ގެ ޙާލަތު ފެނިފައި ހިތާމަކުރައްވާ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރަސްފަންނާއި ސަލްޓަންޕާކަކީ، އެމަނިކުފާނު ހައުސިންގ މިނިސްޓަރުގެ މަޤާމުގައި ހުންނެވި އިރު ތަރައްޤީ ކުރެއްވި ތަންތަނެވެ. ރައީސުލްޖުމްހޫރިއްޔާ ކަމުގެ މަޤާމަށް އެމަނިކުފާނު ވަޑައިގެންނެވުމުގެ ކުރިން ހުންނެވީ މާލޭގެ މޭޔަރު ކަމުގެ މަޤާމުގައިކަމަށް ވާއިރު އޭރުންފެށިގެން މަރާމާތު ނުކުރެވި ރަސްފަންނާއި ޕާކުތައް ދިޔައީ ހަލާކުވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރަސްފަންނާއި ސަލްޓަންޕާކު ވީރާނާވަމުންދާކަން ފާހަގަކުރައްވައި އެކަމުގެ ކަންބޮޑުވުން ފާޅު ކުރައްވައި މިއަދު އެކްސްގައި ޕޯސްޓެއް ކުރައްވާފައެވެ. ރައީސުލްޖުމްހޫރިއްޔާ ވިދާޅުވީ އެ ދެތަނަކީވެސް ތޮށްޖެހިފައިވާ މާލޭގައި، ރައްޔިތުންނަށް ނުހަނު ހިތްހަމަޖެހުމާއި އުފާ ލިއްބައިދޭ ދެތަން ކަމަށާއި އެ ދެތަނުގެ ރީތިކަމާއި އާރޯކަން އަނބުރާ ގެނެސްދީ އަދި ކުރިޔަށްވުރެވެސް ފުރިހަމަކޮށްދިނުމަށް ސަރުކާރުން ޚާއްސަ މަސައްކަތްތަކެއް ކުރާނެކަން މާލޭގެ ރައްޔިތުންނާއި މާލޭގައި ދިރިއުޅޭ އެންމެހާ ރައްޔިތުންނަށް މަޢުލޫމާތަށްޓަކައި ދަންނަވާ ކަމަށެވެ.
ރަސްފަންނު ހަވާލުކޮށްފައި އޮތީ އެމްޓީސީސީއާއެވެ. ރަސްފަންނު ހަލާކު ވަމުންދާތީއާ އެތަން މަރާމާތު ނުކުރާތީ މާލޭ ސިޓީކައުންސިލުންވެސް ވަނީ އެކަމުގެ ކަންބޮޑުވުން ފާޅުކޮށްފައެވެ.
