ވެރިކަންކުރާ ޕީއެންސީއަށް ނިސްބަތްވާ ހިތަދޫ އުތުރު ދާއިރާގެ މެންބަރު މުހައްމަދު ސިނާނު ގެ ގޮނޑި ގެއްލިފައިވާ ކަމަށް ކަނޑައަޅައި ދިނުމަށް އެދި އަމިއްލަ މީހަކު ސްޕްރީމްކޯޓަށް މައްސަލަ ހުށައަޅައިފިއެވެ.  

މިމައްސަލަ ސްޕްރީމް ކޯޓަށް ހުށައަޅާފައި ވަނީ، ޣާލިބު ސަލީމް ނަމަކަށް ކިޔާ މީހެކެވެ.

އޭނާ ސްޕްރީމް ކޯޓަށް ހުށައަޅާފައިވާ މައްސަލައިގައި އެދިފައި ވަނީ، ސިނާނު އެހެން ބަޔަކާ ބައިވެރިވެގެން ނަގާފައިވާ ލޯނެއް ނުދައްކައިގެން އައްޑޫ ސިޓީ ހިތަދޫ މެޖިސްޓްރޭޓް ކޯޓުން ކޮށްފައިވާ ހުކުމާ އެއްގޮތަށް ފައިސާ ދައްކާފައިވާ ނުވާތީ އޭނާގެ މެމްބަރު ކަމުގެ ގޮނޑި ގެއްލިއްޖެކަމަށް ކަނޑައަޅައިދިނުމަށެވެ.

މައްސަލަ ހުށައެޅި ފަރާތުން ފާހަގަކޮށްފައި ވަނީ، އިސްލާމިކް ބޭންކުން ނަގާފައިވާ 3.8 މިލިއަން ރުފިޔާގެ ލޯނެއް ދެއްކުމަށް މިދިޔަ އަހަރު އޮކްޓޫބަރު މަހު، ހިތަދޫ ކޯޓުން ސިނާނާއި އެހެން ބައެއްގެ މައްޗަށް ޙުކުމް ކޮށްފައި ވާއިރު އެ ޙުކުމުގައި ބަޔާންކޮށްފައިވާ ގޮތަށް ފައިސާ ދައްކަމުން ނުދާ ކަމަށެވެ.

އެހެންވެ ޤާނޫނު އަސާސީ އާއި ޤާނޫނުތަކުގައި ބަޔާންކޮށްފައިވާ ގޮތުގެ މަތީން މެމްބަރު ސިނާންގެ ގޮނޑި ގެއްލިއްޖެކަމަށް ކަނޑައަޅައި ދިނުމަށް މައްސަލަ ހުށައެޅި ފަރާތުން ދިވެހިރާއްޖޭގެ ސްޕްރީމްކޯޓުގައި އެދިފައިވެއެވެ.