މާލެ ސަރަހައްދުގައި ސަރުކާރުން ޓެކްސީގެ ޚިދުމަތް ދިނުމަށް ނިންމައި، އެމަސައްކަތް ކުރިޔަށް ގެންދަން އެމްޓީސީސީއާ މިއަދު ހަވާލުކޮށްފިއެވެ.

މިމަސައްކަތް އެމްޓީސީސީއާ ހަވާލުކުރުމަށް ބޭއްވި ރަސްމިއްޔާތުގައި އެއްބަސްވުމުގައި ޓްރާމްސްޕޯޓް މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް އަޙްމަދު ޝަމީމެވެ. އެމްޓީސީސީން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ އަޙްމަދު ސަޢުދީއެވެ.

ސަރުކާރުގެ ޓެކްސީ ލައިން ހިންގުމަށް އެމްޓީސީސީއާ މިހަވާލު ކުރީ، ސަރުކާރުން ޓެކްސީގެ ޚިދުމަތުގެ ތެރެއަށް ވަންނަން ނޫޅޭކަމަށް ވިދާޅުވެ ސަރުކާރު ހިންގާ ޕާޓީ، ޕީއެންސީގެ ޕާލަމެންޓްރީ ގުރޫޕްގެ ލީޑަރު، އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހީމް ފަލާޙް މަޖިލީހުގައި ވާހަކަފުޅު ދެއްކެވިތާ 2 ދުވަސް ފަހުންނެވެ.

މި މަސައްކަތް އެމްޓީސީސީއާ ހަވާލު ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން، ޓްރާންސްޕޯޓް މިނިސްޓަރ މުޙައްމަދު އަމީން ވިދާޅުވީ، އެ ޚިދުމަތް ދިނުމަށް، ފުލްޓައިމް އަދި ޕާޓްޓައިމް ޑްރައިވަރުން ނަގާނެ ކަމަށާއި އެއާއެކު އިތުރު ވަޒީފާތައްވެސް އުފެދޭނެ ކަމަށެވެ. އަދި އެމްޓީސީސީން ބޭނުން ކުރާނީ ތިމާވެއްްޓާއި ރައްޓެހި ހަކަތަ ބޭނުންކުރާނެ ކާރުތައްކަމުގައިވެސް މިނިސްޓަރ އަމީން ވިދާޅުވިއެވެ.

މިނިސްޓަރ އަމީން ވިދާޅުވީ، ކަސްޓަމަރުން ޓެކްސީގެ ޚިދުމަތަށް އެދޭތާ މަދުވެގެން 2 މިނިސްޓްގެ ތެރޭގައި ޚިދުމަތް ލިބޭނެ ކަމަށާއި، އެމްޓީސީސީގެ ޓެކްސީގެ ޚިދުމަތާއި އެކުގައި އެއަރޕޯޓުގެ ޓެކްސީ ކިއުގެ މައްސަލައަށްވެސް ހައްލުތަކެއް ލިބޭނެ ކަމަށެވެ.

ސަރުކާރުން ޓެކްސީގެ ޚިދުމަތުގެ ތެެރެއަށް ވަންނާތީ، ޓެކްސީ ޑްރައިވަރުންނާއި އާއްމުންވެސް ވަނީ އެކަަމަށް ފާޑުކިޔާފައެވެ.