މިދިޔަ 2024 ވަނަ އަހަރު ނިމުނުއިރު ވިޔަފާރިތަކަށާއި ކޮންޓްރެކްޓަރުންނަށް ނުދައްކާ ހުރި ބިލުތަކުގެ އަދަދު ހަތް ބިލިއަން ރުފިޔާއަށް އަރާފައިވާކަމުގައި ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އަމީރު މިހެން ވިދާޅުވީ، ރާއްޖޭގެ މާލީ ހާލަތާއި އަދި ސަރުކާރުގެ މާލީ ސިޔާސަތުތަކާއި ގުޅޭ ގޮތުން، މިއަދު އެމްޑީޕީން އެޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ކުރީގެ މިނިސްޓަރ އަމީރު ވިދާޅުވީ، އާންމުކޮށް އަހަރު ނިމޭއިރު ހުންނަނީ އެ އަދަދު ހުންނަނީ ދެ ބިލިއަނެއްހާ ރުފިޔާގައެވެ. އެހެން ނަމަވެސް މިދިޔައަހަރު އެހާ ގިނަ ފައިސާ ނުދެއްކި ހުރުމުގެ ސަބަބުން އަމިއްލަ ވިޔަފާރިތައް ބަނގުރޫޓްވަމުންދާ ކަމަށެވެ. އަދި ސަރުކާރު ހިންގަމުން ދަނީ ލޭންދޭނަށް ކަމުގައިވެސް އަމީރު ވިދާޅުވިއެވެ. އަދި މިދިޔަ އަހަރު ބަޖެޓް ސަޕޯޓަށް ސަރުކާރުން ހޯދަން މަސައްކަތް ކުރި ފައިސާވެސް ލިބިފައި ނުވާކަމަށާއި، ކަނޑައެޅި ގޮތަށް ދައުލަތުގެ ޚަރަދުތައްވެސް ކުޑަކުރެވިފައި ނުވާ ކަމުގައި އަމީރު ވިދާޅުވިއެވެ.

މީގެ އިތުރުން އަމީރު ވިދާޅުވީ، ސަރުކާރުގެ ހަރަދު ކުޑަކުރުމުގެ ސިޔާސަތު މަގުން ކައްސާލާފައިވާ ކަމަށާއި މިހާރު ކުރަމުންދާ ހަރަދުތަކާ އެކު މި އަހަރުގެ ތެރޭގައި އަނެއްކާ ވެސް ސަރުކާރުން ސަޕްލިމެންޓްރީ ބަޖެޓެއް ހުށައަޅާނެ ކަމަށެވެ.

އަމީރު ވިދާޅުވީ، ބަޖެޓުގައި 7.7 ބިލިއަން ރުފިޔާ ސަލާމަތްވާނެ ކަމަށް ލަފާކޮށްފައި އޮތް ނަމަވެސް މި ޖެނުއަރީ މަސް ނިމިގެންދާއިރު ހަރަދު ކުޑަކުރުމުގެ އެއްވެސް ވިސްނުމެއް ސަރުކާރުން ގެންގުޅޭތައް ނުފެންނަ ކަމަށެވެ.