ރާއްޖެ ޓްރާންސްޕޯޓް ލިންކް، އާރްޓީއެލް ފެރީގެ ޚިދުމަތް އައްޑޫ ސިޓީގައި ފެށުމަށްޓަކައި ވާންޖެހޭ ތައްޔާރީތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން ފަށައިފިއެވެ. 

އައްޑޫ ސިޓީގެ އެކި ރަށްތަކުގެ ކައުންސިލްތަކާއި، ސަރުކާރުގެ އެކި މުއައްސަސާތަކާއި ބައްދަލުކޮށް، ކިޔާލު ހޮދައި މަޝްވަރާކޮށް، އެޚިދުމަތް ވިހާވެސް އަވަހަށް ފެށުމަށް ތައްޔާރުކުރުވުމުގެ މަސައްކަތް އެމް.ޓީ.ސީ.ސީން އަންނަނީ ކުރަމުންނެވެ.އެމްޓީސީސީން ބުނީ، އައްޑޫ ސިޓީ ގަމާއި ހުޅުމީދޫ، ފޭދޫ އަދި ހިތަދޫގައި އާންމުން ހޭލުންތެރި ކުރުމުގެ ސެޝަންތަކެއް ބާއްވާފައިވާކަމަށެވެ.

ފަސޭހައިން އެއްރަށުން އަނެއް ރަށަށް ދަތުރުކުރެވޭނެ ޤައުމީ ފެރީ ނިޒާމެއް ޤާއިމުކުރުމަށް ރާއްޖެ 6 ޒޯނަކަށް ބަހާލައިގެން އަންނަނީ މަސައްކަތް ކުރަމުންނެވެ. މީގެ ދަށުން މިހާތަނަށް ހއ. އަތޮޅާއި، ހދ. އަތޮޅު އަދި ށ. އަތޮޅުގެ މީހުން ދިރިއުޅޭ ރަށްތަށް ފެރީ ނިޒާމުން ގުޅާލާފައެވެ. އަދި ޅ. އަތޮޅާއި ހުވަދޫ އަތޮޅުގައި ވެސް އާރްޓީއެލްގެ ޚިދުމަތް މިހާރު ވަނީ ފަށާފައެވެ.

އާރުޓީއެލް ހިދުމަތަކީ މީގެކުރިން ރައްޔިތުން އެއް ރަށުން އަނެއް ރަށައް ދަތުރުކުރުމުގައި އުފުލަމުން އައި ތަކުލީފަށް ނިނުމެއް ގެނެސްދިނުމަށް މި ސަރުކާރުން ފަށާފައިވާ މަސައްކަތެކެވެ. ތަފާސްހިސާބަށް ބަލާއިރު، އާރްޓީއެލްގެ ޚިދުމަތް ދޭން ފެށިތާ އަހަރެއްގެ ތެރޭގައި 260000 އަށްވުރެ ގިނަ މީހުން ޚިދުމަތް ހޯދާއިފައިވާކަމަށް އެމްޓީސީސީން ބުނެއެވެ. ފެރީގެ ނިޒާމުގެ ސަބަބުން މީގެކުރިން އެކެހެރިވެފައިވާ އެތައް ރަށަކަށް ދިޔުމުގައި ފަސޭހަތަކެއްވަނީ ލިބިފައެވެ. ހަމައެއާއެކު ބޮޑު ހޭދަކޮށްގެން ސިއްޙީ ޚިދުމަތް ހޯދުމަށް އަތޮޅު ތެރޭގެ ރަށްރަށަށް ކުރި ދަތުރުތައް ކުޑަ އަގެއްގައި ހަފްތާގެ ހުރިހާ ދުވަހެއްގައިވެސް ކުރެވޭނެ މަގު މިހާރުވަނީ ފަހިވެގެންގޮސްފައެވެ. 

މި ހިދުމަތް ފެށުމަކީ އެތަކެއް ރައްޔިތުންގެ މޫނުމައްޗަށް މި ސަރުކާރުން ހިނިތުންވުމާއި ފަސޭހަ ގެނެސްދިން ކަމަކަށް ވަނީ ވެގެންގޮސްފައެވެ. އާރުޓީއެލް ހިދުމަތް ރައްޔިތުން ވަނީ ވަރަށް ބޮޑަށް ބަލައިގަނެފައެވެ. އަދި އެކަމަށްޓަކައި ސަރުކާރަށް ޝުކުރުވެރިވެސް ވެއެވެ.