މިމަހުގެ 1 ވަނަ ދުވަހު ހުޅުމާލެ އާއި ސިނަމާލެ ބުރިޖު ގުޅުވައިދޭ ހައިވޭ މަތީގައި ހިނގި އެކްސިޑެންޓްގައި މަރުވި ބިދޭސީ މީހާގެ ބޯމަތިން ދިޔަ ސައިކަލު ދުއްވި ސްޕީޑް މިހާތަނަށް ދެނެގަނެވިފައި ނުވާކަމުގައި ފުލުހުންގެ އިދާރާއިން ހާމަކުރައްވައިފިއެވެ.

ފުލުހުންގެ އިދާރާއިން މިއަދު ނެރުނު ނޫސްބަޔާނުގައި ވިދާޅުވީ، މިއަހަރުގެ ފެބުރުއަރީ މަހުގެ 1 ވަނަ ދުވަހު ހިނގި އެކްސިޑެންޓްގައި މަރުވެފައި ވަނީ ބަނގުލަދޭޝްގެ ރައްޔިތެއް ކަމުގައިވާ ޖާވިދު ޗައުދަރީ (30އަހަރު) ކަމަށެވެ. އޭނާ މަރުވާން ދިމާވީ، ހައިވޭގެ އަރިމަތީގައި ބަހައްޓާފައިވާ ކޯނެއްގައި އޭނާ ދުއްވި ސައިކަލު ޖެހި އޭނާ ވެއްޓުނު ވަގުތު އޭނާގެ ބޯމަތިން ދިޔަ ސައިކަލުގެ ސަބަބުން ލިބުނު ޒަޚަމްތަކާއި ގުޅިގެން ކަމުގައި ފުލުހުންގެ ބަޔާނުގައި ވަނީ ފާހަގަކޮށްފައެވެ.

ބިދޭސީ މީހާގެ ބޯމަތިން ދިޔަ ސައިކަލު ދުއްވި އަންހެންމީހާގެ ވަނަވަރު ހާމަނުކޮށް ފުލުހުންގެ އިދާރާއިން ނެރުނު މިބަޔާނުގައި ވިދާޅުވެފައި ވަނީ އެއަންހެން މީހާގެ ލައިސަންސް ހިފަހައްޓައި ސައިކަލުވެސް ޓޯވކޮށްފައި ވާކަމަށެވެ. އަދި ކޯޓު އަމުރެއްގެ ދަށުން ލައިސަންސް ހިފަހައްޓާފައިވާ މުއްދަތުވެސް އިތުރުކޮށްފައިވާކަމަށާއި، އަންހެންމީހާ ސައިކަލް ދުއްވި ސްޕީޑް ދެނެގަތުމުގެ މަސައްކަތް ކުރަމުންދާ ކަމުގައި ފުލުހުންގެ އިދާރާއިން ވަނީ ވިދާޅުވެފައެވެ.

ފުލުހުންގެ އިދާރާއިން ވިދާޅުވީ، އެ މައްސަަލައިގެ ތަޙްޤީޤު ފުރިހަމަކޮށް ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށްޓަކައި ކުރަންޖެހޭ މަސައްކަތްތައް ކުރަމުންދާ ކަމަށެވެ.