ހދ. އަތޮޅުގެ ބައެއް ރަށްރަށުގައި ސަރުކާރުން ހިންގަމުންދާ މަޝްރޫޢުތައް ކުރިޔަށްދާ ގޮތް، މިނިސްޓަރ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރ ޑރ ޢަބްދުﷲ މުއްޠަލިބު ބައްލަވާ ލައްވައިފިއެވެ.

މި ހަފްތާގެގައި މިނިސްޓަރ މުއްޠަލިބު ވަނީ ހދ. މަކުނުދޫއަށާއި ކުޅުދުއްފުއްޓަށް ވަޑައިގެންފައެވެ. މަކުނުދޫއަށް މިނިސްޓަރ ވަޑައިގެން ބޭއްވި ބައްދަލުކުރެއްވުމުގައި ރައްޔިތުން ހިތްހަމަ ނުޖެހި ޝުއޫރު ފާޅުކޮށްފައިވެއެވެ.

މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރއިން ވިދާޅުވީ، މިނިސްްޓަރ ޑރ. ޢަބްދުالله މުއްޠަލިބް، ހދ. ކުޅުދުއްފުށްޓަށް މިދިޔަ ހޮނިހިރު ދުވަހު ވަނީ ޒިޔާރަތް ކުރައްވައި، ހދ. ކުޅުދިއްފުށީގެ މަގު ހެދުމުގެ ފޭސް 2 ގެ މަސައްކަތް ކުރިއަށްދާ ސައިޓަށާއި 400 ހައުސިން ޔުނިޓް ކުރިއަށް ގެންގޮސްފައިވާ ސަރަހައްދަށް ޒިޔާރަތް ކުރައްވާފައި ކަމަށެވެ. އަދި ކުޅުދުއްފުށީގެ އިރުމަތީ ފަރާތުގެ ގޮނޑުދޮށް ގިރާ ހިސާބާއި އަދި ބަނދަރަށް ކުރިމަތިވެފައިވާ މައްސަލަތައް ވެސް މިނިސްޓަރ ބައްލަވާލެއްވި ކަމުގައި އެމިނިސްޓްރީން ހާމަކުރައްވާފައިވެއެވެ.

މީގެ އިތުރުން، ކުޅުއްދުފުށި އުތުރު ދާއިރާ މެންބަރު މުޙައްމަދު ދާއޫދާއި ހދ. ކުޅުދުއްފުށި ކައުންސިލު މެންބަރުންނާއެކު ފާހަގަކުރެވުނު މައްސަލަތަކަށް ގެނެވޭނެ ޙައްލުތަކާބެހޭގޮތުން މިނިސްޓަރ މަޝްވަރާކުރެއްވި ކަމުގައިވެސް އެމިނިސްޓްރީން ވަނީ ހާމަކުރައްވާފައެވެ.