ހުޅުމާލޭގައި ވޭނެއް ދުއްވަނިކޮށް ސްޓްރޯކެއް ޖެހި، ހާލު ދެރަވި މީހާ ދުއްވި ވެހިކަލް އެކްސިޑެންޓްވުމުން އެމީހާ ފުލުހުންގެ ބަންދަށް ގެންދިޔައީ އޭނާ ހުރީ މަސްތުގެ ހާލަތުގައި ކަމަށް ހީކޮށްގެންކަން ހާމަވެއްޖެއެވެ.

އިއްޔެ 10:13ގައި ހިނގި އެކްސިޑެންޓާއި ގުޅިގެން އެމީހާ ފުލުހުންގެ ބަންދަށް ގެންދިޔުމަށްފަހު ދޫކޮށްލާފައި ވަނީ، ހަވީރު، 17:28ގައި ޔޫރިން ޓެސްޓްކޮށް ނެގެޓިވް ވުމުންކަމުގައި ފުލުހުންގެ އިދާރާއިން ވަނީ ވިދާޅުވެފައެވެ. އެމިހާއަށް ހުޅުމާލެ ހޮސްޕިޓަލުގައި ފަރުވާދޭން ފެށުނީ އޭގެ ފަހުންނެވެ. އަދި މިހާރު އެމީހާ ވަނީ އިތުރު ފަރުވާއަށް އައިޖީއެމް ހޮސްޕިޓަލަށް ބަދަލުކޮށްފައި ކަމުގައި އާއިލާގެ ފަރާތުން ބުނެފައިވެއެވެ.

ވޭން ދުއްވަނިކޮށް ސްޓްރޯކެއް ޖެހުމުގެ ސަބަބުން އެމީހާ ދުއްވި ވޭން ހުޅުމާލެ ފޭސް 1 އާއި ފޭސް 2 ގުޅުވުމަށްޓަަކައި އެންމެ ހުޅަނގަށް އަޅާފައި އޮންނަ ބުރިޖުގެ ޑިވައިޑަތެއްގައިވެސް ޖެހި އެކްސިޑެންޓްވިއެވެ. އޭގެ ފަހުން އެވޭން މަތަވީ ހުޅުމާލެ ފޭސް 1ގެ ފިތުރޯނު މަގުގެ އަރިމަތިން މަގުން ކަހާލައި އެކްސިޑެންޓްވުމުންނެވެ.

މިއެކްސިޑެންޓާއި ގުޅިގެން ފުލުހުން އަމަލުކޮށްފައިވާ ގޮތުން ފުލުހުންގެ އިދާރާއަށް ވަނީ ފާޑުކިޔުންތައް އަމާޒުވެފައެވެ. އަދި އެމީހާގެ އާއިލާގެ ފަރާތުންވެސް ވަނީ އެކަމާއި ގުޅިގެން ކަންބޮޑުވުން ފާޅުކޮށްފައެވެ.