ގއ. ވިލިނގިލި ޒަމާނީވިލާ ފާޠިމަތު ޝިއުނާ އާއި އޭނާގެ ދަރިފުޅު ނިޔާވި މައްސަލައިގެ ޒިންމާ ސަރުކާރުން އުފުލަންޖެހޭނެ ކަމުގައި އެމްޑީޕީން ބުނެފިއެވެ.

އެމްޑީޕީގެ އަންހެނުންގެ ރޫހުން ނެރެފައިވާ ނޫސްބަޔާނުގައި ބުނެފައި ވަނީ، ދެމައިން ނިޔާވި ހާދިސާގައި ކަންކަން ހިނގާފައިވާ ގޮތަށް ބަލާއިރު މި ކަމުގައި ގއ. އަތޮޅު ހޮސްޕިޓަލްގެ އިހުމާލު ވަރަށް ބޮޑު ކަމަށް ބެލެވެއެވެ.  އަދި ހަމަ އެއާއެކު ބަލިމީހެއް ބަލާ ދާ އެއަރ އެމްބިއުލަންސްއެއްގައި ފަރުވާދިނުމަށް ބޭނުންވާ ސިއްޙީ އާލާތްތައް ނެތި، އޮކްސިޖަން ދެވޭނެ ގޮތެއް ނެތުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމުގައިވެސް އެބަޔާނުގައި ބުނެފައި ވެއެވެ.

އެބަޔާނުގައި ބުނެފައި ވަނީ، މާބަނޑު އަންހެނަކަށް މި ދިމާވި ހިތާމަވެރި ހާދިސާއަކީ ސިއްޙީ ދާއިރާ މިވަރަށް ކުރިއަރާފައިވާ ޒަމާނެއްގައި، ހިނގައިގެން ވާނެ ފަދަ ކަމެއް ނޫން ކަމަށާއި، އެހެންކަމުން ސަރުކާރުން މި މައްސަލައިގައި އިހުމާލުވެފައިވަތީ އެކަން ހަރުކަށި އިބާރާތުން ކުށްވެރި ކުރާކަމަށެވެ.

އަދި މި މައްސަލަ ރާއްޖޭގެ ރައްޔިތުންގެ މަޖިލީހުންނާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަދި ކަމާ ގުޅޭ އެހެން މުޢައްސަސާތަކުންވެސް ތަޙުޤީޤުކޮށް މިކަމުގައި ޒިންމާވާ ފަރާތްތައް ހޯދާ ޒިންމާދާރު ކުރުވުމަށް އެމްޑީޕީގެ އަންހެނުންގެ ރޫހުން ގޮވާލަމެވެ.

ކުރިއަށް އޮތްތާގައި މިފަދަ މައްސަލަތައް ތަކުރާރުވިޔަ ނުދިނުމަށް، މިމައްސަލަ ރަނގަޅަށް ބަލައި، ފިޔަވަޅު އެޅުމަކީ ކޮންމެހެންވެސް ކުރަންޖެހޭ ކަމެއް ކަމުގައި އަންހެނުންގެ ރޫޙުން ދެކެމެވެ.