ރައީސުލްޖުމްހޫރިއްޔާ ރައްޔިތުންގެ މަޖިލީހުގައި މާދަމާ ރިޔާސީ ބަޔާން އިއްވަވާ ޖަލްސާއަށް ރައްޔިތުންގެ މަޖިލިސް ކުރާގޭގެ ސަރަހައްދު ހިމެނޭހެން މާލޭގެ ބޮޑު ސަރަހައްދެއް އާއްމު ޓްރެފިކަށް ބަންދުކޮށްފިއެެވެ.

މިގޮތުން ރައްޔިތުންގެ މަޖިލިސް ކުރާގޭގެ ސަރައްދުގެ މަގުތަކާއި ގޯޅިތަކާއި، މުލިއާގެ ވަށައިގެންވާ މަގުތަކާއި ގޯޅިތަކާއި، ރައީސުލްޖުމްހޫރިއްޔާގެ އޮފީސް ހިމެނޭ ސަރަހައްދާއި ޖުމްހޫރީމައިދާން ހިމެނޭ ސަރައްހައްދު ވަނީ އާއްމު ޓްރެފިކަސް ބަންދުކޮށްފައެވެ.

މާދަމާގެ ޖަލްސާއަށް ބަންދުކޮށްފައިވާ މައިމަގު ތަކުގެ ތެރޭގައި އަމީރު އަހުމަދު މަގު ޗާންދަނީ މަގާއި ގުޅުނު ހިސާބުން ފެށިގެން މަޖިީދިއްޔާ ސްކޫލާއި ހަަމައަށް ބަންދުކޮށް އެމަގާއި ބޮޑުތަކުރުފާނު މަގާއި ގުޅޭ ގޯޅިތައްވެސް ވަނީ ބަންދުކޮށްފައެވެ. މީގެ އިތުރުން އިސްލާމީމަރުކަޒު މައިދާން ފެށޭ ހިސާބުން އިރަށް މެދު ޒިޔާރަތް މަގާއި އެމަގާއި ގުޅިފައިވާ ހުރިހާ ގޯޅިތަކެއް ވަނީ ބަންދުކޮށްފައެވެ. 

ހެންވޭރުގެ ބޮޑު ބައެއް މާދަމާ އާއްމު ޓްރެފިކަށް ބަންދުވާއިރު، ފުލުހުންގެ އިދާރާއިން ވިދާޅުވީ، މަގުތައް ބަންދު ކުރާނީ ހެނދުނު 7:00 އިން ފެށިގެން ޖަލްސާ ނިމެންދެން ކަމަށެވެ.

މާދަމާ ރިޔާސީ ބަޔާން އިއްވާ ވަގުތު ރައްޔިތުންގެ މަޖިލިސް ކުރާ ގޭދޮށަށް އާއްމުން އެއްވުމަށް އެމްޑީޕީން ގޮވާލާފައި ވާއިރު، ފުލުހުން އާއްމުން ސޯސަންމަގާއި ހަމައަށް ފަހަތަށް ޖައްސާނެކަމަށް ބެލެވެއެވެ.