މިދިޔަ ހޮނިހިރު ދުވަހު ހައިވޭމަތީގައި ބަހައްޓާފައި ހުރި، ކޯނެއްގައި ޖެހި އެކްސިޑެންޓްވެ ބިދޭސީ މީހަކު ވެއްޓުނު ވަގުތު އެމީހާގެ ބޯމަތިން ދިޔަ ސައިކަލު ދުއްވާފައި ވަނީ އުމުރުން 60 އަހަރުގެ ދިވެހި އަންހެނެއް ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

އެދުވަހުގެ ހެނދުނު 8:17 ހާއިރު ހިނގި އެ އެކްސިޑެންޓްގައި ލިބުނު އަނިޔާތަކާއި ގުޅިގެން ބިދޭސީ މީހާ ވަނީ މަރުވެފައެވެ. ބަނގުލަދޭޝްއަސް ނިސްބަތްވާ އެމީހާ މަރުވެފައިވާކަމުގައި ފުލުހުންނަށް ހޮސްޕިޓަލުން މައުލޫމާތުދީފައި ވަނީ ހެނދުނު 9:05 ގައި ކަމަށް ފުލުހުންގެ އިދާރާއިން ވިދާޅުވެފައި ވެއެވެ.

އެދުވަހުގެ އެކްސިޑެންޓް ހިނގައި ދިޔަ ގޮތުގެ ތަފްސީލެއް ފުލުހުން ހާމަ ނުކުރެއެވެ. އެހެން ނަމަވެސް އެމީހާ މަރުވީ އެމީހާގެ ބޮލަށް ފަހަތުން އައި ސައިކަަލެއް އެރުމުގެ ސަބަބުން ލިބުނު ޒަޚަމްތަކާއި ގުޅިގެން ކަމަށް ހާމަވެ، މީޑިއާތަކުން ކުރަމުން އައި ސުވާލުތަކަށް ފުލުހުން ޖަވާބެއް ނުދީ ލަސް ކުރުމަށްފަހު މިއަދު ބުނެފައި ވަނީ އެ ހާދިސާ އާއި ގުޅިގެން އުމުރުން 60 އަހަރުގެ ދިވެހި އަންހެނަކާއި ސުވާލުކޮށްފައި ވާ ކަމަށެވެ. އަދި އޭނާގެ ލައިސަންސްވެސް ހިފަހައްޓާފައިވާކަން ފުލުހުން ހާމަކޮށްފައި ވަނީ މިއަދުއެވެ.