ސަރުކާރާއި ދެކޮޅަށް އިތުރު މުޒާހަރާތައް ބާއްވައި މުޒާހަރާތައް ވަރުގަދަ ކުރާނެ ކަމުގެ އިންޒާރު ދެމުން އެމްޑިޕީން މިރޭ މާލޭގައި ކުރިޔަށް ގެންދިޔަ ހިނގާލުން ނިންމާލައިފިއެވެ.

އާޓިފިޝަލް ބީޗުން 8:30ގައި ފެށި ހިނގާލުން އަނބުރާ އައިސް އާޓިފިޗަލް ބީޗަށް ނިންމާލީ މީރޭގެ 11:00 ހާއިރުގައެވެ. ހިނގާލުމުގެ ބައިވެރިން އާޓިފިޝަލް ބީޗުން ނުކުމެ ބޮޑުތަކުރުފާނު މަގުން ގޮސް އަމީނީ މަގުން އައިސް އަނެއްކާވެސް ހިނގާލުން ނިންމާލީ އާޓިފިޝަލް ބީޗަށެވެ. 

އެމްޑީޕީގެ ހިނގާލުން ނިންމާލުމުގެ ގޮތުން ވާހަކަފުޅު ދައްކަވަމުން، އެޕާޓީގެ ޗެއާޕާރސަން ފައްޔާޒު އިސްމާޢީލް ވިދާޅުވީ، ސަރުކާރާއި ދެކޮޅު މުޒާހަރާތައް އިތުރަށް ވަރުގަދަ ކުރައްވާނެ ކަމަށެވެ. އަދި ސަރުކާރުން ދަނީ ޤާނޫނު އަސާސީގެ ރޫޙާއި ޑިމޮކްރަސީގެ އުސޫލުތަކާއި ޚިލާފު ވަމުން ކަމަށާއި، މިހާރު ހަމައެކަނި ރާއްޖޭގައި މިނިވަން ކަމާއި އެކު ހިނގާ މުއައްސަސާއެއްގެ ގޮތުގައި އޮތީ ދިވެހިރާއްޖޭގެ ސުޕްރީމް ކޯޓުގަކަމަށެވެ. އަދި ސްޕްރީމްކޯޓުގައި މިހާރު ތާވަލުކޮށްފައި އޮތް ޤާނޫނު އަސާސީއާއި ގުޅޭ  ދުސްތޫރީ މައްސަލަ ފައްޔާޒު ފާހަގަކުރެއްވިއެވެ.

މިރޭގެ ހިނގާލުމުގައި ވާހަކަފުޅު ދެއްކެވި އެމްޑީޕީގެ ބޭބޭފުޅުން ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްތިއުފާއަށް ގޮވާލައްވާފައެވެ. އަދި ހޯމް މިނިސްޓަރ ޢަލީ އިހްސާން ހައްޔަރު ކުރުމަށާއި، ޑީއެންއާރްގެ ޑާޓާ ބޭސްއިން ވައްކަން ކުރި މައްސަލަ މިނިވަންކަމާއި އިންސާފުވެރިކަމާއި އެކު ބަލައި ތަޙްޤީޤު ކުރުމަށްވެސް އެމްޑީޕީން ވަނީ ގޮވާލާފައެވެ.

މިރޭގެ ހިނގާލުމުގައި އެމްޑީޕީގެ އިސްބޭފުޅުންނާއި އާއްމު މެމްބަރުންގެ އިތުރުން އެހެން ޕާޓީތަކުގެ ވެރިންނާއި އާއްމު މެމްބަރުންވެސް ވަނީ ބައިވެރިވެފައެވެ.