ރާއްޖޭގައި ހިތުގެ އޮޕަރޭޝަންތައް ކުރަން ފެށިތާ 5 އަހަރު ފުރުމާއި ގުޅުވައިގެން ކުރިޔަށް ގެންދާ، "ކާޑިއަކް ވޯކްޝޮޕް 2023" ރައީސުލްޖުމްހޫރިއްޔާގެ ނައިބު ފައިޞަލް ނަސީމް ފައްޓަވައިދެއްވައިފިއެވެ.

އޭޑީކޭ ހޮސްޕިޓަލުން ހާމަކޮށްފައިވާ ގޮތުގައި މި ވޯކްޝޮޕަކީ، ރާއްޖޭގައި ހިތުގެ ބަލިތަކާއި ފަރުވާތަކާއި ގުޅޭ ގޮތުން، ސްކޫލުތަކުގެ ދަރިވަރުންނަށާއި، ކޮލެޖްތަކާއި ޔުނިވަރސިޓީތަކުގައި ޞިއްޙީ ދާއިރާއިން ކިޔަވާ ދަރިވަރުންނަށް މަޢުލޫމާތު ފޯރުކޮށްދީ، އެކަމުގެ ހޭލުންތެރިކަން އިތުރުކުރުމުގެ ގޮތުން ކުރިޔަށް ގެންދާ ވޯކްޝޮޕެކެވެ.

މިވޯކްޝޮޕް ފެށުމުގެ ރަސްމިއްޔާތު ޝަރަފްވެރިކޮށްދެއްވައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި ވަނީ، ރާއްޖެއަށް ޞިއްޙީ ދާއިރާއިން ހޯދެމުން އަންނަ ކުރިއެރުންތަކުގައި، އައު ޓެކްނޮލޮޖީއާއެކު މަތީފެންވަރުގެ ޚިދުމަތްތަކާއި ފަރުވާތައް ތަޢާރަފްކޮށް ޞިއްޙީދާއިރާ ކުރިއެރުވުމަށް އޭޑީކޭ ހޮސްޕިޓަލުންކޮށްފައިވާ މަސައްކަތްތަކާއި ޙާޞިލްކޮށްފައިވާ ކާމިޔާބީތައް ފާހަގަކުރައްވާފައެވެ.

މިގޮތުން އެމަނިކުފާނު ވިދާޅުވީ، ޞިއްޙީ ދާއިރާ ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، ރާއްޖޭގެ ޞިއްޙީދާއިރާ ތަރައްޤީކުރުމުގައި ޕްރައިވެޓް ސެކްޓަރގެ ބައިވެރިވުންވެސް ވަރަށްބޮޑު ކަމަށެވެ.

މިރަސްމިއްޔާތުގައި ރައީސުލްޖުމްހޫރިއްޔާގެ ނައިބު ވަނީ، އޭޑީކޭ ހޮސްޕިޓަލުން ތައްޔާރުކޮށްފައިވާ "ކާޑިއަކް ޕޭޝަންޓް ހޭންޑް ބުކް" ނެރެދެއްވާފައެވެ. މިފޮތަކީ، ހިތުގެ ބަލިތައް ހުންނަ މީހުންނަށާއި، އެނޫން ފަރާތްތަކަށްވެސް ހިތުގެ ބަލިތަކުން ރައްކާތެރިވުމާއި ފަރުވާތަކާ ގުޅޭ ގޮތުން، މުހިއްމު މައުލޫމާތުތަކެއް ހިމަނާފައިވާ ފޮތެކެވެ.

ދުނިޔޭގައި އެންމެ ފުރަތަމަ ހިތުގެ އޮޕަރޭޝަންތައް ކުރަން ފަށާފައި ވަނީ، މީގެ 65 އަހަރު ކުރިންނެވެ. ރާއްޖޭގައި އެންމެ ފުރަތަމަ ހިތުގެ އޮޕަރޭޝަނެއް ކޮށްފައި ވަނީ، 08 އޮގަސްޓް 2018ގައި، އޭޑިކޭ ހޮސްޕިޓަލްގައެވެ.