މިމަހުގެ 23 ވަނަ ދުވަހު ހުޅުމާލޭ ގެއެއްގައި ހިނގި އަލިފާނުގެ ހާދިސާއެއްގައި އުމުރުން 13 އަހަރުގެ ކުޑަ ފިރިހެންކުއްޖަކު ފިހިފައިވާތީ، އެކަން ހިނގައި ދިޔަގޮތް ބަލައި ތަޙްޤީޤު ކުރަމުން އަންނަކަމުގައި މިއަދު ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އެމައުލޫމާތު ފުލުހުންނަށް ލިބުމާއެކު އެކަން ބަލައި ތަޙްޤީޤު ކުރަން ފަށާފައިވާ ކަމަށެވެ. އެހެންނަމަވެސް އެކަމާއި ގުޅޭ މައުލޫމާތު ފުލުހުން މީޑިއާއަށް ޙިއްޞާކޮށްފައި ވަނީ މިއަދުގައެވެ.

އަލިފާނުގެ ހާދިސާ ހިނގީ ގޭސް ދޫކޮށްފައި ގިނަ އިރުތަކެއް ވީފަހުން ކުއްޖާ އުނދުން ރޯކުރަން އުޅުމުގެ ތެރޭގައި އަލިފާން ރޯވެގެންނެވެ. އަލިފާނުގެ އެހާދިސާގައި އެކުއްޖާގެ ހަށިގަނޑުގެ %50 ވަނީ ފިހިފައި ކަމަށް މައުލޫމާތު ލިބިފައިވެއެވެ.

ހާދިސާ އާއި ގުޅޭ ގޮތުން ފުލުހުންނާއި ސިފައިންވެސް އިތުރު މައުލޫމާތެއް ހާމަކޮށްފައެއް ނުވެއެވެ.