ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުޅުއްވަނީ، ތިންބާރުވަކިކޮށްފައިވާ ދިވެހިރާއްޖޭގެ ވެރިކަމުގެ ނިޒާމްތައް އެއްކޮށްލައްވައި މުށަށް ލައްވައިގެން ކަމުގައި އެމްޑީޕީގެ ކުރީގެ ޗެއާޕާރސަން މާރިޔާ އަހުމަދު ދީދީ ވިދާޅުވެއްޖެއެވެ.

މާރިޔާ މިމޭރުމުން ވާހަކަފުޅު ދައްކަވާފައި ވަނީ، ރޭ އެމްޑީޕީން ބޮޑިބަތް ޕާކުގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

މާރިޔާ ވިދާޅުވީ، މިއަދު މަޖިލީހުގައި ހުރިހާ ގޮނޑިއެއްގައި އެ އިންނެވީ ރައީސް މުއިއްޒު ކަމަށާއި، ފަނޑިޔާރުގޭގެ ގޮނޑިތަކުގައި ވެސް އެ އިންނަވަނީ ރައީސް މުއިއްޒު ކަމަށެވެ. އަދި ސާފުކޮށް ޑީއެންއާރު މެދުވެރިކޮށް ވަޒީރުން އިސްވެ ތިއްބަވައި އައިޑެންޓިޓީ ވަގަށް ނަގަމުންދާއިރު ވެސް ފިޔަވަޅެއް ނޭޅުނު ކަމުގައި ވިދާޅުވެ މާރިޔާ ވަނީ ފާޑު ވިދާޅުވެފައެވެ.

"އެމްޑީޕީއަށް އެނިސްބަތްވާ މަދު މެމްބަރުންކޮޅު ފިޔަވައި، މިހާރު ހުރިހާ ގޮނޑިއެއްގައި އެ އިންނަަވަނީ ރައީސް މުއިއްޒު. ސްޕީކަރަކަށް އިންނަވަނީ ރައީސް މުއިއްޒު. ދެއިންނަ މީހަކަށް އިންނަނީ ރައީސް މުއިއްޒު. އަދި ހަމަ އެހެންމެ ފަނޑިޔާރުން ޢައްޔަނުކޮށް ވަކިކުރަނީ ރައްޔިތުންގެ މަޖިލީހުން ކަމަށްވާތީ، އެފަނޑިޔާރު ގޭގެ ގޮނޑިތަކުގައިވެސް އިންނަވަނީ، ރައީސް މުއިއްޒޭ ބުންޏަސް އެ ދޮގަކަށް ނުވާނެ."

މާރިޔާ އިތުރަށް ވިދާޅުވީ މިނިވަން މުއައްސަސާތަކުގައިވެސް ކަންކަން ހިނގަމުން ދަނީ އެހެން ކަމަށެވެ. އަދި ވަޒީރުން އިސްކޮށް ތިއްބަވައިގެން، ރައްޔިތުންގެ މައުލޫމާތު ވަގަށްނަގައި ޕާޓީއަށް މީހުން ވައްދަމުންދާއިރު، އެޅޭ ފިޔަވަޅެއް ނެތްކަމުގައިވެސް މާރިޔާ ވިދާޅުވިއެވެ. 

ރައީސް ޑރ. މުޙައްމަދު މުޢިއްޒު އިސްކޮށް ހުންނެވި ޕާޓީ ޕީއެންސީއަށް ރައްޔިތުންގެ މަޖިލީހުގެ ސުޕަރ މެޖޯރިޓީ އޮތް އިރު އެޕާޓީން ޤާނޫނު އަސާސީއަށް ގެންނަމުންދާ ބަދަލާއި، ޤާނޫނުތަކަށް ގެންނަމުންދާ ބަދަލުތަކުގެ ސަބަބުން ދައުލަތުގެ ނިޒާމްތައް އޮޅު ބާރުތައް އެއްވެގެން ދާނޭ ކަމުގައި އިދިކޮޅު އެމްޑީޕީން އަންނަނީ ބުނަމުންނެވެ.