މާލޭގައި ރަސްފަންނު ސަރަހައްދުން ބިދޭސީއަކަށް ތޫނު ހަތިޔާރުން ބިރު ދައްކައި ފޭރުނު 3 މީހަކު ފުލުހުން ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ އެމައްސަލައިގައި ހައްޔަރުކޮށްފައި ވަނީ، އުމުރުން 34 އަހަރުގެ ފިރިހެނަކާއި، 36 އަހަރުގެ ފިރިހެނަކާއި 30 އަހަރުގެ ފިރިހެނެއް ކަމަށެވެ. 

ފުލުހުންގެ އިދާރާއިން ވިދާޅުވީ އެމީހުން ބިދޭސީ މީހާގެ އަތުން ފޭރުނުކަން އެނގުނީ، އެމީހުން އެމީހާ އަތުން ފޭރުގެން ރަސްފަންނުން ދުވެފައި ނުކުތްތަން ފުލުހުންނަށް ފެނިގެން އަދި ބިދޭސީ މީހާ ދިން މައުލޫމާތުން ކަމަށެވެ. އަދި އެތިން މީހުން އަތުލައިގަތީ މާލޭ ނޯތު ހާބަރުން ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ. އަދި އެމީހުންގެ އަތުން އެމީހުން ފޭރުނު ފައިސާވެސް ފެނިފައިވާކަމުގައި ފުލުހުންގެ އިދާރާއިން ވަނީ ވިދާޅުވެފައެވެ.

މިމައްސަލަ ފުލުހުންގެ އިދާރާއިން ގެންދަނީ ތަޙްޤީޤު ކުރަމުންނެވެ.