މާލޭގެ މަގުތަކުގައި އާއްމު ޓްރެފިކަށް ދަތިވާ ގޮތަށް އަދި ޤާވާއިދާއި ޚިލާފަށް ޕާކުކޮށްފައި ހުރި ވެހިކަލްތައް ޓޯވކޮށް ނަގަން ފަށައިފިއެވެ.

ފުލުހުންގެ އިދާރާއިން އިއްޔެ ވިދާޅުވީ، މާލެއާ ހުޅުމާލޭގެ އެކި ސަރަޙައްދުތަކުގައި މަގުބޭނުންކުރާ ފަރާތްތަކަށް ދަތިވާގޮތަށް އަދި ގަވާއިދާ ހިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް އިއްޔެ ކޮށްފައިވާ ކަމަށެވެ. އަދި އެކަމަކީ އެއީ، އާންމު ރައްޔިތުންނަށް ފަސޭހަކަމާއެކު މަގުބޭނުންކުރެވޭނެ އެކަށީގެންވާ މާހައުލެއް ގާއިމުކުރުމަށްޓަކައި ކުރެވޭ މަސައްކަތެއް ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.

ޕާކު ކުރާނެ ޖާގަ ނުދައްކައި ޓްރެފިކް ވަޔަލޭޝަން ސްޓިކާ ނުޖެހުމަކީ، ރައީސުލްޖުމްހޫރިއްޔާ ރިޔާސީ ވަޢުދެކެވެ.

ޓްރެފިކް ވަޔަލޭޝަން ސްޓިކާ ނުޖެހި ނަމަވެސް ދޭތެރެ ދޭތެރެއިން ފުލުހުން އަންނަނީ މާލޭގެ މަގުތަކުގައި ޤަވާއިދާއި ޚިލާފަށް ޕާކުކޮށްފައި ހުންނަ ހަތަރުފުރޮޅު އުޅަނދުތަކާއި ސައިކަލުތައް ޓޯވ ކުރަމުންނެވެ. އަދި ޓޯވ ކުރާ އުޅަނދުފަހަރު ދޫކުރަނީ ޖޫރިމަނާ ދެއްކުމުންނެވެ.