ދަ ޑިމޮކްރެޓްސްގެ އެތެރޭގެ އިންތިޚާބު މިއަންނަ ފެބުރުއަރީ މަހުގެ 15 ދުވަހު ބޭއްވުމަށް ނިންމައި، ޕާޓީގެ ރައީސް އަދި ނައިބު ރައީސްގެ މަޤާމަށް ކުރިމަތިލާން ބޭނުންވާ ފަރާތްތަކަށް ފުރުޞަތު ހުޅުވާލައިފިއެވެ.

ދަ ޑިމޮކްރެޓްސްގެ ރައީސާއި ނައިބު ރައީސްގެ މަޤާމު ހުސްވެފައި ވަނީ، އެމަޤާމުތަކުގައި ތިއްބެވި ބޭފުޅުން އެޕާޓީ ދޫކުރައްވައި އެމްޑީޕީއަށް ސޮއިކުރެއްވުމާއި ގުޅިގެންނެވެ. އެޕާޓީގެ ރައީސް ޙަސަން ލަޠީފާއި، ނައިބު ރައީސް މުޙައްމަދު ޝިފާޒް ވަނީ އެމްޑީޕީއަށް ސޮއިކުރައްވައި އެޕާޓީގެ ހަރަކާތްތަކުގައި ބައިވެރިވާން ފައްޓަވާފައެވެ.

ފެބުރުއަރީ މަހުގެ 15 ވަނަ ދުވަހުގައި ބާއްވާ އިންތިޚާބުގައި މެމްބަރުން ހޮވާނީ، ޕާޓީގެ ރައީސާއި، ޕާޓީގެ ފިރިހެން ނައިބު ރައީސްގެ މަޤާމަށެވެ. 

އިންތިޚާބުގައި ވާދަކުރައްވަން ބޭނުންވާ ފަރާތްތަކަށް މަޤާމުތަކަށް ކުރިމަތި ލުމުގެ ފުރުޞަތު ހުޅުވާލާފައި ވަނީ، މިއަންނަ ބުރާސްފަތި ދުވަހުގެ މެންދުރު 12:00 އާއި ހަމައަށް ކަމުގައި އެޕާޓީން ވަނީ ހާމަކޮށްފައެވެ.

ދަ ޑިމޮކްރެޓްސް އުފައްދާފައި ވަނީ 2023 ވަނަ އަހަރު އެމްޑީޕީގެ ރިޔާސީ ޓިކެޓާއި ގުޅިގެން އުފެދުނު ހިތްހަމަ ނުޖެހުންތަކުގެ ތެރެއިންނެވެ. އެޕާޓީން ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބުގައި ވާދަކޮށް ކުރިމަތިލާންޖެހުނީ ބޮޑު ނާކާމިޔާބީއަކާއެެވެ.