ރިޔާސީ މިދައުރު ނިމޭއިރު، ރާއްޖޭގެ 71 ކައުންސިލެއްގެ އައު އިމާރާތް އެޅިގެންދާނޭ ކަމުގައި، ސިޓީތަކާއި އިދާރީ ދާއިރާތައް ހިންގުމާއި، އާއްމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު އާދަމް ޝަރީފް މިހެން ވިދާޅުވީ، ކޮންޓްރެކްޓަރ ފައިނޭންސް އުޞޫލުން 55 ރަށެއްގެ ކައުންސިލް އިދާރާ އަލުން ޢިމާރާތްކުރުމަށް މެލޭޝިއާގެ ކުންފުންޏެއް ކަމުގައިވާ "ހެކްސްޓަރ ގްލޯބަލް" އާއެކު އެއްބަސްވުމުގައި ސޮއިކުރުމުގެ ރަސްމިއްޔާތުތައް ފަހު، އެކްސްގައި ކުރެއްވި ޕޯސްޓުގައެވެ.

ވަޒީރު އާދަމް ޝަރީފް ވިދާޅުވީ،  ޗައިނާގެ އެހީގައި އަޅާ އެ ކައުންސިލް އިދާރާތަކުގެ ޢަމަލީ މަސައްކަތް މިއަހަރު ފެށޭކަމަށާއި،  މަޝްރޫޢު ނިމޭއިރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ރާއްޖޭގެ ކައުންސިލް އިދާރާތަކުގެ 71 އިންސައްތަ މުޅިން އައު ކުރެވޭނެކަމަށެވެ.

"

ވަޒީރު އާދަމް ޝަރީފް ވަނީ، އިއްޔެ ސޮއިކުރެވުނު އެއްބަސްވުމުގެ ދަށުން އިމާރާތް ކުރެވޭ ކައުންސިލްތަކުގެ އައު އިމާރާތްތަކާއި ގުޅޭ ތަފްސީލްތައްވެސް ހިއްސާކުރައްވާފައެވެ. އެގޮތުން އެމަނިކުފާނު ވިދާޅުވީ، އިއްޔެ ސޮއި ކުރެވުނު އެގްރީމަންޓްގެ ދަށުން 55 ކައުންސިލް އިދާރާ ފަރުނީޗަރާއެކު ޤާއިމުކުރެވޭނެއެވެ. އޭގެތެރޭގައި ދެ ބުރިއަށް ޢިމާރާތްކުރާ 27 ކައުންސިލް އިދާރާ ހިމެނޭނެ ކަމުގައިވެސް ވިދާޅުވިއެވެ.

ވަޒީރު އާދަމް ޝަރީފް ވިދާޅުވީ، ދެ ބުރިއަށް އިމާރާތްކުރާ ކައުންސިލް އިދާރާތަކުގެ މަސައްކަތް ފަށާތާ 18 މަސް ދުވަހުގެތެރޭގައި ނިމޭނެ ކަމަށާއި އަދި އެއް ބުރީގެ ޢިމާރާތްތައް މަސައްކަތް ފަށާތާ އެއް އަހަރު ދުވަހުގެތެރޭގައި ނިންމޭނެކަމަށް އުންމީދު ކުރެވޭ ކަމަށެވެ. އަދި މުޅި މަޝްރޫޢުގެ އަގަކީ، 36 މިލިއަން ޑޮލަރު ކަމުގައިވެސް އެމަނިކުފާނު ވިދާޅުވިއެވެ.