ވެރިކަން ކުރާ ޕާޓީ ޕީއެންސީއަށް، މެމްބަރުން ވެއްދުމަށް ފުރާފައިވާ ވަގުފޯމްތަކުގައި ހެކިވެރިއެއްގެ ގޮތުން ސޮއެކުރައްވާފައިވާ، ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު މުޙައްމަދު އިސްމާޢީލްގެ މަސައްލަ ބަލައިދޭން އެމްޑީޕީން އެދިއްޖެއެވެ.

އެޕާޓީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ލީގަލް ޑިރެކްޓަރު އަދި ޤާނޫނީ ވަކީލު މަޙްފޫޒު ސަޢީދު ވިދާޅުވީ، ވަގު ފޯމުގައި ހެއްކެއް ގޮތަށް ވިލިމާލެ ދާއިރާގެ މެންބަރު މުހައްމަދު އިސްމާއިލް ސޮއިކުރި ކޮންމެ ފޯމެއްގެ މައްސަލަ ވަކިވަކިން ބަލައިދިނުމަށް އެދިފައި ވާނޭ ކަމަށެވެ. މަޙްފޫޒު ވިދާޅުވީ، މުޙައްމަދު އިސްމާޢީލް ކުރައްވާފައިވާ އެއަމަލަކީ، ޖިނާޢީ ކުށުގެ ޢަމަލެއް ކަމަށެވެ. 

ސިޔާސީ ޕާޓީތަކުގެ ގާނޫނުގެ 49 ވަނަ މާއްދާގައި ބަޔާންކޮށްފައި ވަނީ، ސިޔާސީ ޕާޓީއެއްގެ މެންބަރުކަމަށް، ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ، ހުށައެޅި ކޮންމެ ފޯމަކަށް، އެކަން ކުރި ފަރާތެއް 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށެވެ. 

ޕީއެންސީއަށް މެމްބަރުން ވެއްދުމަށް މީހުންނަށް ނޭނގި އެމީހުންގެ ނަމުގައި ފޯމްތައް ފުރައި އިލެކްޝަންސް ކޮމިޝަނަށް ހުށައަޅާފައި ވާއިރު، އޭގެތެރެއިން ބައެއް ފޯމުތަކުގައި ހެކިވެރިއެއްގެ ގޮތުގައި ސޮއެކުރެއްވިކަމަށް މުޙައްމަދު އިސްމާޢީލް އިއުތިރާފްވެވަޑައިގެންފައިވެއެވެ.