މީސްމީހުންނަށް ނޭނގި އެމީހުންގެ ނަމުގައި ވަގުފޯމް ހުށައަޅައިގެން، ވެރިކަންކުރާ ޕާޓީ ޕީއެންސީއަށް ވައްދާފައިވާކަމަށް ބުނެ 3000 ވުރެ ގިނަ މީހުންގެ ޝަކުވާ ލިބިފައިވާ ކަމުގައި އެމްޑީޕީން ހާމަކޮށްފިއެވެ.

އެޕާޓީގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި، އެ ޕާޓީގެ ޤާނޫނީ ކޮމިޓީގެ މެމްބަރު އިބްރާހީމް ޝިޔާމް ވިދާޅުވީ، އެޝަކުވާތަކަށް ބަލާއިރު،  އޭގެ ތެރޭގައި ކުރީގެ އައިޑީ ކާޑުގައި ހުރި ފޮޓޯ ބޭނުންކުރުމާއި، ސޮއި ފޯޖު ކުރުމާއި، ފިންގަރޕްރިންޓް ފޯޖުކޮށްފައި ހުރުން ފަދަ ކަންކަން ހިމެނޭކަމަށެވެ.

އެމްޑީޕީން ތުހުމަތުކޮށްފައިވާ ގޮތުގައި ގިނަ ބަޔަކަށް ނޭނގި އެމީހުން ވެރިކަންކުރާ ޕާޓީއަށް ވައްދާފައި ވަނީ، ހޯމް މިނިސްޓްރީގެ ދަށުން ހިންގަމުން އަންނަ، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގައި ހުރި މައުލޫމާތު ވަގަށް ނަގައިގެންނެވެ. އެހެންވެ އެކަމުގައި މިހާރުގެ ހޯމް މިނިސްޓަރ ޢަލީ އިޙްސާން ޒިންމާ އުފުއްލަވަން ޖެހޭނެ ކަމުގައި އެމްޑީޕީން ވަނީ ބުނެފައެވެ. 

މީގެ އިތުރުން ހޯމް މިނިސްޓަރު ޢަލީ އިޙްސާން މަޤާމުގެ ޒިންމާތަކުން އެކަހެރިކުރުމަށް ގޮވާލުމާއިއެކު، އެމްޑީޕީން ވަނީ ހޯމް މިނިސްޓަރުގެ ޢިތުބާރުނެތްކަމުގެ މައްސަލަވެސް ރައްޔިތުންގެ މަޖިލީހަށް ވައްދާފައެވެ.