ދަތް އުނގުޅުމަކީ އަހަރެމެން ހަނދާން ހުންނަން ފެށި އިރުއްސުރެ ކުރަމުން އަންނަ ކަމެކެވެ. އެހެންކަމުން މި ކަން މި ކުރެވެނީ އެންމެ ރަނގަޅު ގޮތުގައިތޯ ގިނަ މީހުން ހިތަށް ވެސް ނާރާނެއެވެ. ނަމަވެސް ދަތް އުނގުޅުމުގައި ސަމާލުކަންދޭންޖެހޭ  ކަންތައްތަކެއް އެބަ ހުއްޓެވެ.

ދަތް އެނގުޅާ ބުރުހުގެ ނަރުގަނޑަކީ ތިމާގެ އަނގައިގެ ހަންގަނޑާއި ދަތްތަކަށް އެކަށީގެންވާ ނަރުގަނޑެއްތޯ ކަށަވަރުކުރުމަކީ މިގޮތުން ވަރަށް މުހިންމު އެއް ކަމެވެ. ބައެއް ބުރުސްތަކުގެ ނަރުގަނޑު ވަރަށް މަޑު އިރު، ބައެއް ބުރުހުގެ ނަރުގަނޑު އާދައިގެ މިންވަރަކަށް ހަރެވެ. އަދި ވަރަށް ހަރު ނަރުގަނޑުލީ ބުރުސް ވެސް ބާޒާރުން ލިބެން ހުރެއެވެ. ގިނަ ފަހަރު އަހަރެމެންނަށް ހީވެފައި އޮންނަނީ ބުރުހުގެ ނަރުގަނޑު މަޑުވެއްޖެ ނަމަ އެ ބުރުހަކީ އެއްވެސް ފައިދާއެއް ނެތް ބުރުހެއްގެ ގޮތުގައެވެ. ނަމަވެސް ބުރުހުގެ ނަރުގަނޑު ހަރުވުމާއި މަޑުވުމުގައި އުފެއްދުންތެރިންގެ މަޤްޞަދެއް ވެއެވެ. އެކި އިންސާނުންގެ އަނގައިގެ ހިރުގަނޑު އުފެދިފައި ވަނީ އެކި ގޮތްގޮތަށެވެ. ބޭނުން ކުރެވޭ ބުރުހުގެ ނަރުގަނޑަކީ ތިބާގެ އަނގައިގެ ހަންގަޑާއި ނަރުގަނޑަށް އެކަށީގެންވާ ވަރަށް ވުރެ ހަރު ނަރުގަނޑަކަށް ވެއްޖެ ނަމަ، ދަތްތަކުގެ ބޭރު ފަށަލަ ހަލާކުވެ ނެތިގެން ހިނގައިދާނެއެވެ. އެހެންކަމުން ތިބާގެ ދަތްތަކަށް އެކަށީގެންވާ ނަރުގަނޑެއް އެކުލެވޭ ބުރުހެއް ހޯދުމުގައި ސަމާލުކަން ދިނުން ވަރަށް މުހިންމެވެ.

ބައެއް މީހުންނަކީ ހެނދުނު ހޭލާ ގޮތަށް ދަތް އުނގުޅައިގެން އެ ދުވަހުގެ ރޭގަނޑު ނިދަންވަންދެން ވެސް އުޅޭ ބައެކެވެ. މީގެތެރެއިން ގިނަ މީހުން ނިދާނީ ވެސް ދަތް ނުއުނގުޅައެވެ. މިއީ ވެސް ރަނގަޅު ގޮތެއް ނޫނެވެ. ދަތް ނުއުނގުޅާ 8 ގަޑިއިރަށް ވުރެ ގިނަ އިރު ވެއްޖެ ނަމަ ދަތްތަކުގެ އެތެރޭގައި ހަރުލާފައި ހުންނަ ކާއެއްޗެހިން އަނގައާއި ދަތްތަކުގައި ބެކްޓީރިއާ އުފެއްދުމަށް މަގުފަހިވެއެވެ. މިއަށް އިނގިރޭސި ބަހުން ކިޔަނީ 'ޕްލޭކް'އެވެ. އެހެންކަމުން 'ޕްލޭކް'އިން ސަލާމަތްވުމަށް މަދުވެގެން ދުވާލަކު ދެ އިރު ދަތް އުނގުޅުން އާދައަކަށް ހަދަން އެބަ ޖެހެއެވެ.

Advertisement

ދަތްއުނގުޅުމުގައި ބޭނުން ކުރާ ބޭހަކީ ވެސް ބޭނުންވާ މާއްދާތައް އެކުލެވޭ ބޭހެއްތޯ ކަށަވަރު ކުރުން މުހިންމެވެ. އެގޮތުން ކެމިކަލްގެ ބާވަތެއް ކަމަށްވާ 'ފްލޮރައިޑް' އެކުލެވެ ބޭހެއް ބޭނުންކުރުން ވަރަށް މުހިންމެވެ. މީގެ ސަބަބުން ކުރިން ބަޔާންކުރެވުނު 'ޕްލޭކް'އިން އަނގަތެރެ ސަލާމަތްކޮށްދީ ދަތްތައް ވަރުގަދަކޮށްދޭނެއެވެ. އެހެންކަމުން ބޭނުން ކުރާ ބޭހުގެ ވަހާއި އޭގެން އަނގަޔަށް ދޭ ރަހައަށް ބެލުމުގެ ބަދަލުގައި އޭގައި އެކުލެވޭ މާއްދާތަކަށް އިސްކަންދެވޭތޯ ބަލާށެވެ.

ދަތް އުނގުޅާ އިރު އަތުގައި ހުރި ބާރެއް ލާފައި ދަތް އުނގުޅުން ވެސް ރަނގަޅެއް ނޫނެވެ. އެކަށީގެންވާ މިންވަރަކަށް ވުރެ ބާރަށް އަނގައިގެ ދަތްތަކާއި ހިރުގަނޑުގައި އުނގުޅޭކަމުގައިވާނަމަ ދަތްތަކުގެ ބޭރުގައިވާ ތުބި ފަށަލަ ގޮސް ދަތްތަކުގެ އޮފްކަން ގެއްލުމާއި އަނގައިގެ ހިރުގަނޑު ހަލާކުވުމަށް މަގުފަހިކޮށްދެކެވެ. އެހެންކަމުން އަނގައިގައި ނަރުގަނޑު އުނގުޅާ އިރު ވީހާވެސް މަޑުން އުނގުޅޭތޯ ބެލުން މުހިންމެވެ. ދުލަކީވެސް ދަތް އުނގުޅުމުގެ ތެރޭގައި ހިމެނޭ ބައެކެވެ. އަދި ރަނގަޅު ގޮތުގައި ދޫ ސާފުނުކުރެވިއްޖެ ނަމަ ދުލުގެ މަތީގައި އުފެދޭ ބެކްޓީރިއާތަކަކީ ސާފުކުރަން ވަރަށް އުނދަގޫ އެއްޗެކެވެ. މިއީ މި ޒަމާނުގައި ބޭނުން ކުރެވޭ އަނގަދޮވުމަށް ބޭނުންކުރާ އާލާތްތަކުން އެންމެ އެކަށީގެންވާ މިންވަރަށް ކުރެވޭނެ ކަމެއް ނޫނެވެ. އެހެންކަމުން 'މައުތްވޮޝް' ބޭނުން ކުރާ ފަރާތްތަކުން ވެސް ބުރުހެއްގެ ބޭނުން ކޮށްގެން ދޫ އުނގުޅާލުން މުހިންމެވެ.