ހުޅުމާލެ ފޭސް 2 ގައި ބަހައްޓާފައި ހުރި، ސްޓެލްކޯގެ ޓްރާންސްފޯމަރަކުން ވައްކަން ކުރަން އުޅެނިކޮށް ހިފެހެއްޓުމުން ސްޓެލްކޯގެ މުވައްޒަފަކަށް ހަމާލާދިން މީހާ ހައްޔަރުކޮށް ފުލުހުން އޭނާގެ ވަނަވަރު ހާމަކޮށްފިއެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި، އެމައްސަލަ އާއި ގުޅިގެން ހައްޔަރުކޮށްފައި ވަނީ، ށ، ބިލެތްފަހި، ޗަނބޭލިގޭ އުމުރުން 37 އަހަރުގެ އިބްރާހީމް ޛާލިފް އެވެ. ފުލުހުންގެ އިދާރާއިން ހާމަކުރައްވާފައި ވާ ގޮތުގައި އޭނާ ފުލުހުންގެ ބެލުމުގެ ދަަށަށް ގެނެސްފައި ވަނީ ރޭގެ 21:45 ހާއިރުގައެވެ.

ހުޅުމާލެ ފޭސް ދޭއްގެ ރީތިގަސްމަގު ބުރިޖު ކައިރީގައި ހުރި ސްޓެލްކޯގެ ޓްރާންސްފޯމަރަކަށް ގެއްލުންދީ ވައްކަން ކުރަން އުޅެނިކޮށް އޭނާ ހިފެހެއްޓުމުން އެތަނަށް ދިޔަ ސްޓެލްކޯގެ މުވައްޒަފަކަށް އޭނާ ވަނީ ރެންޗަކުން ހަމަލާދީ ބުމަމަތި ފަޅާލާފައެވެ.

ވައްކަން ކުރުމާއި މާރާމާރީ ހިންގުމުގެ މައްސަލަ ތަޙްޤީޤު ކުރަމުންދާކަމުގައި ފުލުހުންގެ އިދާރާއިން ވަނީ ވިދާޅުވެފައެވެ.