އެމްޑީޕީގެ ލީޑަރޝިޕާއި މެދި ހިތްހަމަ ނުޖެހިގެން އެމްޑީޕީން ވަކިވެ ދަޑިމޮކްރެޓްސް އުފެއްދެވި އިސްމީހުން އެޕާޓީ ދޫކޮށް އަލުން އެމްޑީޕީއާ ގުޅިވަޑައިގެންފިއެވެ.

ދަ ޑިމޮކްރެޓްސް ދޫކޮށްލައްވައި އަލުން އެމްޑީޕީއާ ގުޅިވަޑައިގެންނެވި މެމްބަރުންގެ ތެރޭގައި، ދަ ޑިމޮކްރެޓްސް ނައިބު ރައީސް މުޙައްމަދު ޝިފާޒާއި އެޕާޓީން 2023 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވި ރިޔާސީ ކެންޑިޑޭޓުގެ ރަނިން މޭޓު ޙުސައިން އަމުރު ހިމެނިވަޑައިގަންނަވައެވެ. މީގެ އިތުރުން އެމްޑީޕީގައި ކުރިން އުޅުއްވުމަށް ފަހު ދަ ޑިމޮކްރެޓްސްއާ ގުޅިވަޑައިގެންނެވި، އިބްރާހިމް ރަޝީދު، މާމިގިލީ އިބޫވެސް ވަނީ އަލުން އެމްޑީޕީއަށް ސޮއިކުރައްވާފައެވެ.

ޚަބަރު ލިބިފައިވާ ގޮތުގައި މީގެ އިތުރުންވެސް ދަ ޑިމޮކްރެޓްސްގެ އިސް ބައެއް މެމްބަރުން އެޕާޓީ ދޫކުރައްވައި އެމްޑީޕީއާ ގުޅިވަޑައިގަންނަވާނެއެވެ. އެމްޑީޕީއަށް ތާއީދު ކުރާ ފަރާތްތަކުން ކުރިން ތުހުމަތުކޮށްފައިވާ ގޮތުގައި ރައީސް ނަޝީދަށް ވަފާތެރިބޭފުޅުން އެމްޑީޕީން ވަކިވެ އައު ޕާޓީއެއް ހެދީ ރައީސް ނަޝީދަށް އާއްމުންގެ ވަރަށް ބޮޑު ތާއީދެއް އޮތް ކަމަށް ބަލައިގެންނެވެ. އެހެންނަމަވެސް ރިޔާސީ އިންތިޚާބުގައި އެޕާޓީއަށް ބޮޑު ނާކާމިޔާބީއަކާއި ކުރިމަތިވި އިރު ރައްޔިތުންގެ މަޖިލިސް އިންތިޚާބުގައި ކުރިމަތިވީ އެއަށްވުރެ މާ ބޮޑު ނާކާމިޔާބީއަކާއެވެ. ރައްޔިތުންގެ މަޖިލިސް އިންތިޚާބުގައި ރައީސް ނަޝީދު ތާއީދު ކުރައްވައި ނެރުއްވި އެއްވެސް ކެންޑިޑޭޓަކަށް މަޖިލީހުގެ ގޮނޑިއެއް ކާމިޔާބެއް ނުކުރެވުނެވެ.