ފަސް މިލިޔަން ގަސް އިންދުމުގެ ޕްރޮގްރާމުގެ ދަށުން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިހާތަނަށް 52،334 ގަސް އިންދައިފިއެވެ.

މެނޭޖިންގ ޑިރެކްޓަރ ޙުސައިން ފަހުމީ އެކްސްގައި ކުރެއްވި ޕޯސްޓުގައި ވިދާޅުވީ، ރައީސް ޑރ.މުއިއްޒު އިއުލާން ކުރެއްވި ފަސް މިލިޔަން ގަސް އިންދުމުގެ ޕްރޮގްރާމަށް ވާސިލުމަށްޓަކައި، ސްޓެލްކޯއިން 500،000 ގަސް އިންދުމަށް އަމާޒު ހިފާފައިވާ ކަމަށާއި މިގޮތުން މި އަހަރުގެ ޖޫން މަހުން ފެށިގެން މަހަކު 8،340 ގަސް ސްޓެލްކޯއިން އިންދާފައިވާނެ ކަމަށެވެ. ގަސް އިންދުމުގެ ޕްރޮގްރާމް ހިމެނޭހެން ރައީސުލްޖުމްހޫރިއްޔާ ކޮންމެ ވަޢުދެއްވެސް ވަނީ ކައިރި އަދި ދުރު މުސްތަޤުބަލުގައި އެއިން ރައްޔިތުންނަށް ކުރާނެ ފައިދާއަށް ބައްލަވައިގެން ކަމުގައިވެސް ފަހުމީ ވިދާޅުވިއެވެ.

ރިޔާސީ މިދައުރުގެ ތެރޭގައި ފަސްމިލިޔަން ގަސް އިންދެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތިމާވެށީގެ ދާއިރާއިން ވެވަޑައިގެންފައިވާ ވަޢުދެކެވެ.