ސަރުކާރުގެ ސުޕަރމެޖޯރިޓީ އޮތް މަޖިލީހުން ޤާނޫނު އަސާސީއަށް ގެނެސްފައިވާ ބަދަލުތަކާއި ދެކޮޅު ހެދުމުގެ ގޮތުން، ޤާނޫނު އަސާސީގެ ދިފާޢުގައި މަގުމަތީގެ ހަރަކާތްތައް ފެށުމަށް އިދިކޮޅު ޕާޓީ އެމްޑީޕީން މިރޭ ނިންމައިފިއެވެ.

އެޕާޓީން މިރޭ ބޭއްވި ޤައުމީ މަޖިލީހުގެ ޖަލްސާގައި ވަނީ، ޤާނޫނު އަސާސީގެ ދިފާޢުގައި ކުރިޔަށް ގެންދާ މަގުމަތީގެ ހަރަކާތް މިޖެނުއަރީ މަހުގެ 31 ވަނަ ދުވަހު ބޭއްވުމަށް ނިންމައި ފާސްކޮށްފައެވެ. މިއީ އިދިކޮޅު އެމްޑީޕީން ރައީސް ޑރ. މުޙައްމަދު މުޢިއްޒުގެ ސަރުކާރާއި ދެކޮޅަށް މަގުމައްޗަށް މިގޮތަށް މުޒާހަރާއަށް ނުކުތުމަށް ނިންމި ފުރަތަމަ ނިންމުމެވެ. މީގެ ކުރިން ހުސްވި ޑިސެމްބަރު މަހުގެ 10 ވަނަ ދުވަހުވެސް، އެމްޑީޕީން ވަނީ ޤާނޫނު އަސާސީގެ ދިފާޢުގައި އަލިމަސް ކާނިވަލުގައި ޖަލްސާއެއް ބާއްވާފައެވެ. އެޖަލްސާގައިވެސް ގިނަ އަދަދެއްގެ މީހުން ބައިވެރިވިއެވެ.

ޤާނޫނު އަސާސީއަށް ގެނެސްފައިވާ އިސްލާޙުތަކަކީ، އޭގެ ސަބަބުން ދިމިޤުރާތީ އުސޫލުތަކާއި ހަމަތައް ގެއްލިގެން ގޮސްފައިވާ އިސްލާޙްތަކެއް ކަމުގައި އެމްޑީޕީން ވަނީ ބުނެފައެވެ، ޚާއްޞަ ގޮތެއްގައި ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް ޤާނޫނު އަސާސީއަށް ގެނެސްފައިވާ އިސްލާޙާއި، ލާމަރުކަޒީ ނިޒާމަށް ގެންނަމުންދާ އިސްލާޙްތައް އެމްޑީޕީން ޚާއްޞަ ގޮތެއްގައި ފާހަގަކޮށްފައިވެއެވެ.