ލޯކަލް ކައުންސިލްތަކުގެ ރައީސުންގެ މަޤާމަށްވެސް ވާދަކުރައްވާ ބޭފުޅުން ރަނިންގ މޭޓަކާއި އެކު އިންތިޚާބުގައި ވާދަކުރުމުގެ ޚިޔާލެއް ރައީސް ފާޅުކުރައްވައިފިއެވެ.

ރައީސް މިޚިޔާލުފާޅު ކުރެއްވީ، އެމަނިކުފާނު މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ރޭ، ގދ. ފިޔޯރީ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. 

ކައުންސިލަރުންގެ އަދަދު މަދުނުކޮށް ކައުންސިލްތަކަށް ކުރާ ހޭދަ ކުޑަކުރެއްވުމާއި ގުޅޭ ގޮތުން ދެކެވަޑައިގަންނަވާ ގޮތް ހާމަކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، ކައުންސިލްތަކުގެ ރައީސް ކަމަށް ކުރިމަތިލާ މީހުންނާއެކު ރަނިންގ މޭޓެއް ކުރިމަތިލައިގެން ރަނިންގމޭޓާ އެކުގައި ވޯޓުލައިގެންވެސް ކުރިއަށް ގެންދެވިދާނެކަމަށް އެމަނިކުފާނަށް ފެނިވަޑައިގަންނަވާ ކަމަށެވެ. އޭރުން އެއް ފިކުރެއްގެ، އެއް ޚިޔާލެއްގެ އަދި އެއް ސިޔާސީ ފިކުރެއްގެ ދެމީހުން އައުމުގެ ފުރުޞަތުވެސް އޮންނާނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. 

މީގެ އިތުރުން ހަމައެގޮތަށް އަންހެނުންގެ ތަރައްޤީއަށް މަސައްކަތްކުރާ ކޮމިޓީވެސް ބަދަލުކުރެވިދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، އެ މަނިކުފާނުގެ ސަރުކާރަކީ ރައްޔިތުންގެ ޚިޔާލާއި މަޝްވަރާ ހޯދައިގެން ކުރިޔަށްދާ ސަރުކާރެއް ކަަމަށެވެ. އަދި އެމަނިކުފާނުގެ ސަރުކާރުގައި، އެމަނިކުފާނު ބޭނުންފުޅުވަނީ ރައްޔިތުންގެ ގާތަށް ވަޑައިގެން، ރައްޔިތުން ބޭނުންވާ ކަންކަން އަޑުއައްސަވައިގެން ރައްޔިތުން ބޭނުންވާ ގޮތަށް ކަންކަން ކުރިއަށްގެންދެވުމަށް ކަމުގައިވެސް ވިދާޅުވިއެވެ.