މާލޭގެ ގެއެއްގެ ތެރޭގައި މަރުވެފައި އޮއްވައި ފެނުނު މީހެއްގެ މަރުގެ ސަބަބު ދެނެގަތުމަށް ޕޯސްޓްމޯޓަމް ހަދަން ނިންމައިފިއެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި، މިއަދު މާލޭގެ ގެއެއްގެ ތެރޭގައި މަރުވެފައި އޮއްވައި ފެނިފައި ވަނީ، މ. ތަރިވިލާގޭ ހުސައިން އަހުމަދު، (41އ) އެވެ. އައިޖީއެމްއެޗަށް ގެނައި މީހަކު މަރުވެފައި އޮވެގެން އެކަން އެ ހޮސްޕިޓަލުން ފުލުހުންނަށް ރިޕޯޓް ކުރީ މިއަދު ހެނދުނު، 9:53 ހާއިރުގައި ކަމަށް ފުލުހުންގެ އިދާރާއިން ވިދާޅުވެފައިވެއެވެ.

ހުސައިން އަހުމަދުގެ ޕޯސްޓް މޯޓަމް ހެދުމަށް ނިންމާފައިވާ ކަމުގައި ފުލުހުން ހާމަކޮށްފައިވީ ނަމަވެސް އެ ނިންމުން ނިންމީ ކީއްވެގެން ކަމެއް ފުލުހުން ހާމަކުރައްވާފައެއް ނުވެއެވެ. ހުސްވި ޑިސެމްބަރު މަހުގެ ތެރޭގައިވެސް މާލޭގައި ވަނީ ގާތް ގާތުގައި އެގޮތަށް މީހުން މަރުވެފައި ތިއްބައި ފެނިފައެވެ.