މަސްތުވާތަކެތިން މީހުން ސަލާމަތްކޮށް ދިނުމަށް ކައުންސިލަރުން ބިނާކުރުމާއި ގުޅޭ ގޮތުން، ހެލްތު މިނިސްޓްރީ އާއި އެލައިޑް އިންޝުއަރެންސް އާއެކު މަޝްވަރާކޮށްފިއެވެ.

އެންޑީއޭގެ ޗެއަރޕާސަން ލުބްނާ ޒާހިރު ވިދާޅުވީ، އެފަރާތްތަކާއި އެކު ކުރިޔަށް ގެންދެވުނު މަޝްވަރާތަކުގެ ބޭނުމަކީ، ބޭނުމަކީ ރާއްޖޭގެ ހުރިހާ ރަށެއްގައިވެސް މަސްތުވަތަކެތީ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ބިނާކުރުން ކަމަށެވެ. މިގޮތުން ކުރިޔަށް ގެންދިޔުމަށް ނިންމާފައިވާ ޕްރޮގްރާމަކީ މައިގަނޑުގޮތެއްގައި އޮންލައިންކޮށް ހިންގުމަށް ނިންމާފައިވާ ޕްރޮގްރާމެއް ނަމަވެސް މި ޕްރޮގްރާމުގެ ބައެއް ބައިތައް ކްލާސްތަކަށް ހާޒިރުވެ ކުރިއަށްގެންދިޔުމަށް ނިންމާފައިވާކަމަށެވެ.

މި އެންޑީއޭއިން ހާމަކުރައްވާފައިވާ ގޮތުގައި ރާއްޖޭގެ ހުރިހާ ހިސާބެއްގައި މަސްތުވާތަކެތީގެ މައްސަލަތައް ފުޅާވަމުން އަންނައިރު، މިހާރުގެ ސިޔާސަތަކީ، ކޮމިއުނިޓީގައި ކުދިން ބައިތިއްބައިގެން ކޮމިއުނިޓީއަށް ރީއިންޓަރގްރޭޓް ކުރެވޭނެ ގޮތަށް ފަރުވާގެ ބައެއް އިތުރުކުރުމެވެ.

ރާއްޖޭގައި އެންމެ ބޮޑު އެއް މައްސަލައަކީ މަސްތުވާތަކެތީގެ މައްސަލަކަމުގައި ވާއިރު މަސްތުވާތަކެތީގެ މައްސަލައަށް ހައްލު ހޯދުމަށް، ފަރުވާގެ ނިޒާމް ހަރުދަނާ ކުރެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ ކަމެކެވެ.