ކޮކޮނަޓް ހިސްޕިޑް ބީޓްލް ކޮންޓްރޯލްކުރުމަށް ދިވެހިރާއްޖޭގައި ނެޗުރަލް އެނެމީ ލެބޯޓަރީއެއް ޤާއިމުކުރުމަށް ޗައިނާގެ މާހިރުންގެ ދިރާސާ މަސައްކަތްތައް ފަށާފައިވާ ކަމުގައި، ދަނޑުވެރިކަމާއި ދިރޭ ތަކެއްޗާއި ބެހޭ ވުޒާރާއިން ވިދާޅުވެއްޖެއެވެ.

އެ ވުޒާރާއިން ވިދާޅުވީ،  ދިވެހިރާއްޖޭގެ ރުއްތަކަށް ގެއްލުންދޭ މިމަޑި ކޮންޓްރޯލްކުރުމަށް ތިމާވެއްޓާއި ރައްޓެހި، އަދި ދެމެހެއްޓެނިވި ޙައްލެއް ހޯދުމަށް ދިވެހިރާއްޖެއަށް އެހީތެރިކަން ފޯރުކޮށްދިނުމަށް ޗައިނާ ސަރުކާރުން އެއްބަސްވެފައިވާ ކަމަށާއި އެކަމުގެ ފަންނީ އެހީ ފޯރުކޮށް ދިނުމަށް ބޭނުންވާ ދިރާސާތަކުގެ މަސައްކަތް މިހާރު ފަށާފައިވާ ކަމަށެވެ. 

ދަނޑުވެރިކަމާއި ދިރޭ ތަކެއްޗާއި ބެހޭ ވުޒާރާއިން ވިދާޅުވީ، ނެޗުރަލް އެނެމީ ލެބޯޓަރީ ޤާއިމްކުރުމަށް އެންމެ އެކަށީގެންވަނީ ހދ. ހަނިމާދޫކަން އެކަމާއި ގުޅޭ ދިރާސާތައް ކުރި ޓީމުން ފާހަގަކޮށްފައިވާ ކަމަށެވެ. ހަނިމާދޫ އަކީ މިހާރުވެސް އެގްރިކަލްޗަރ ސެންޓަރެއް ހިންގަމުން އަންނަ ރަށެކެވެ. 

ޗައިނާ ސަރުކާރުން ދިވެހި ސަރުކާރާއި އެކު ވެފައިވާ އެއްބަސްވުމުގެ ދަށުން، ދިވެހިރާއްޖޭގައި ކޮކޮނަޓް ހިސްޕިޑް ބީޓްލްއަށް ހަމަލާދޭ ޕެރެސިޓޮއިޑް އާލާކޮށް ގިނަކުރުމަށް ޚާއްޞަ ލެބޯޓްރީއެއް ޤާއިމްކޮށްދީ، އެތަނުގައި މަސައްކަތްކުރާ މުވައްޒަފުންގެ ހުނަރާއި ޤާބިލްކަން އިތުރުކޮށްދިނުމަށް ޚާއްޞަ މަޝްރޫޢެއް ހިންގުމަށް ޗައިނާގެ މައި ސަރުކާރުން އެމަސައްކަތް ހަވާލުކޮށްފައި ވަނީ ޗައިނީޒް އެކަޑަމީ އޮފް ޓްރޮޕިކަލް އެގްރިކަލްޗަރަލް ސައިންސަސް (ކަޓާސް) އާއެވެ. ނެޗުރަލް އެނެމީ ލެބޯޓަރީއެއް ޤާއިމުކުރުމަށްޓަކައި ހަދަންޖެހޭ އެންމެ ފަހުގެ ދިރާސާތައް ކޮށްފައި ވަނީ އެފަރާތުންނެވެ. 

ރުކުމަޑި ކޮންޓްރޯލް ކުރުމަށް، ހއ. މާފަހީގައި، ބަޔޮލޮޖިކަލް ކޮންޓްރޯލް ޕްރޮގްރާމެއް ހިންގަމުންދާކަމަށާއި، ކަޓާސްގެ މާހިރުންނާއި މިނިސްޓްރީ އޮފް އެގްރިކަލްޗަރިކަލްޗަރ އެންޑް އެނިމަލް ވެލްފެއަރގެ ފަންނީ މުވައްޒަފުންގެ ޓީމުން ވަނީ އެރަށަށްވެސް ޒިޔާރަތްކޮށް އެމަޝްރޫޢު ކުރިޔަށްދާގޮތްވެސް ބައްލަވާލައްވާފައި ކަމުގައި، ދަނޑުވެރިކަމާއި ދިރޭ ތަކެއްޗާއި ބެހޭ ވުޒާރާއިން ވިދާޅުވެފައިއެވެ.