ފްރާންސްގައި ކުރިން ގޭންގު ހަރަކާތްތަކުގައި ބައިވެރިވެ އުޅުނު އަދި، މީގެ 12 އަހަރު ކުރިންފެށިގެން ރާއްޖޭގައި ޤަވާއިދާއި ޚިލާފަށް ދިރިއުޅެމުން އަންނަ ފްރާންސް މީހާ އާއި އޭނާގެ އާއިލާ ރާއްޖެއިން ފޮނުވާލުމަށް ސަރުކާރުން ނިންމާފައިވާތީ އާއްމުން އެކަމަށް ފާޑުކިޔަންފަށައިފިއެވެ.

މުސްލިމް އެއާއިލާގެ ފިރިހެން މީހާއަކީ، ފްރާންސްގައި އުޅުނު ގޭންގު ހަރަކާތްތަކުގައި ބައިވެރިވެފައިވާ މީހެއް ކަމަށާއި، އެެހެންނަމަވެސް އޭނާ އިސްލާމް ވުމަށްފަހުގައި އެ އުޅުން ދޫކޮށްލާފައިވާ ކަމުގައި އޭނާ ބުނެފައިވާ ކަމުގައި މިހާރު ނޫހުން ރިޕޯޓްކޮށްފައި ވެއެވެ. 

އޭނާގެ މައްސަލަ މީޑިއާގައި ފެންމަތިވުމުން، ބައެއް އާއްމުން ވަނީ، އެމީހާ އާއި އާއިލާ ރާއްޖޭގައި ވަޒަންވެރިވެ ދިރިއުޅުމަށް ފުރުޞަތު ދިނުމަށް ގޮވާލާފައެވެ. އެމީހާ އަނބުރާ ފްރާންސަށްދާން ބޭނުން ނުވަނީ، އޭނާ ހައްޔަރުކޮށް ޖަލަށްލައިފާނެތީތަކުގައި ބުނެފައިވެއެވެ.

ފްރާންސްގެ އެ ފިރިހެންމީހާ ރާއްޖެއަށް އައީ ޓޫރިސްޓް ވިސާގައި އޭނާގެ އަނބިމީހާ އާއި ތިން ދަރިންނާއިއެކުގައެވެ. އޭގެ ފަހުން މިވީ 12 އަހަރުގެ ތެރޭގައި ރާއްޖޭގައި އެދެމަފިރިންނަށް އިތުރު ދެކުދިން ވަނީ ލިބިފައެވެ. އެމީހުން މިހާރު ދިރިއުޅެމުން އަންނަނީ، ތ. ވޭމަންޑޫގައެވެ.

ރާއްޖޭގައި ޤަވާއިދާއި ޚިލާފަށް ދިރިއުޅެމުން އަންނަ އެއާއިލާ ރާއްޖެއިން ފޮނުވާލުމަށް ސަރުކާރުން މަސައްކަތްކުރަމުން އަންނަ ކަމުގައި އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަހީދު ވަނީ އިއްޔެ ވިދާޅުވެފައެވެ.