ހުޅުމާލެ ސަހަރާ މިސްކިތުގައި މިރޭ މަޣުރިބު ނަމާދު ނިމުނުތަނާ މީހަކު ވަޅި ހިފައިގެން މިސްކިތަށް އަރައި މުދިމަށް ހަމަލާދޭން އުޅެފިއެވެ.

ފުލުހުންގެ ތަރުޖަމާނު އަޙްމަދު ޝިފާން ވިދާޅުވީ، މިހާރު އެމީހާ ވަނީ ހައްޔަރުކޮށްފައި ކަމަށެވެ. އެމީހާ ފުރަތަމަ މިސްކިތަށް އަރައި ހަމަލާދޭން އުޅުމުން މިސްކިތުގައި ތިބި މީހުން އެމީހާ ހުއްޓުވާފައިވާ ކަމަށާއި، މިސްކިތުން ނުކުތުމަށްފަހު އޭނާ ވަނީ، މަގުމަތިން އޭނާ ހުއްޓުވި ފުލުސް މީހާއަށްވެސް ވަޅި ހަމަލާދޭން މަސައްކަތްކޮށްފައި ކަމުގައި ޝިފާން ވިދާޅުވިއެވެ.

ފުލުހުން އެމީހާ ހައްޔަރުކޮށްފައި ވަނީ، ހުޅުމާލެ ސަހަރާ މަގުންނެވެ. ފުލުހުންގެ އިދާރާއިން ހާމަކޮށްފައިވާ ގޮތުގައި ހައްޔަރު ކުރި މީހާއަކީ، އުމުރުން 33 އަހަރުގެ ދިވެހި ފިރިހެނެކެވެ. ފުުލުހުން އޭނާ ހައްޔަރު ކުރި ވަގުތު ނަގާފައިވާ ވީޑިއޯއެއް މިހާރު ސޯޝަލް މީޑިއާަގައި ދައުރުވަމުން އަންނައިރު އެވީޑިއޯގައި ތިމަންނާއަކީ ނަފްސާނީ ބަލި މީހެކޭ އޭނާ ބުނާއަޑު އިވެއެވެ.

ފުލުހުންގެ އިދާރާއިން ވިދާޅުވީ މި މައްސަލަ ތަޙްޤީޤު ކުރަމުންދާ ކަމަށެވެ،