ގެދޮރުވެރިޔާ ސްކީމުގެ ދަށުން ދޫކުރާ 4،000 ފްލެޓު ދިނުމަށް ކުރީ ސަރުން ކަނޑައެޅި ލިސްޓް ގޯސްކަމަށް ބުނެ އެ ލިސްޓް ރިވިއު ކުރާތާ އެއް އަހަރު ވީއިރުވެސް، ނުނިމި ތާރީޚަކަށް ފަހު ތާރީޚެއް ދެމުން ގޮސް، ލިސްޓް އާއްމު ކުރުން އެންމެ ފަހުން މުއްދަތެއް ނެތް ގޮތަށް މިއަދު ފަސްކޮށްފިއެވެ.

ހައުސިންގ މިނިސްޓްރީން މިއަދު ނެރުނު ނޫސްބަޔާނުގައި ބުނެފައި ވަނީ، ފްލެޓަށް އެދި ހުށަހަޅާފައިވާ 20،697 އެޕްލިކޭޝަން ފޯމު ބެލުމުގައި ކަށަވަރު ކުރަން ޖެހޭ ގިނަ ކަންކަން ހުރުމާ ގުޅިގެން އެ މަސައްކަތް ނިންމުމަށް އަދިވެސް އިތުރު ވަގުތު ބޭނުންވާ ކަމަށެވެ. އެނޫސް ބަޔާނުގައި ބުނެފައި ވަނީ، އެ މަސައްކަތްތަށް އިތުރު މުއްދަތު ހޭދަވަމުން ދިޔަ ކަމުގައި ވިޔަސް، ސަރުކާރުގެ މަޤުޞަދަކީ އެ ސްކީމުން ފުލެޓު ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރު ކުރުމާ އެކު، އެ ސްކީމުގެ ދަށުން ތަރައްގީ ކުރާ ފުލެޓުތައް ދޫކުރެވެނީ ހައްގުވެރީންނަށްކަން ޔަގީންކުރުން ކަމުގައި އެމިނިސްޓްރީން ވަނީ ބުނެފައެވެ. 

ފްލެޓް ލިސްޓް ރިވިއު ކުރުމަށްފަހު އާއްމު ކުރުމަށް އެކި ތާރީޚުތައް ދެމުން އައިސް، މިއަދަކީ އެންމެ ފަހަށް މިނިސްޓަރު ހައިދަރު ކަނޑައެޅުއްވި ދުވަހެވެ. އެހެން ނަމަވެސް އެންމެ ފަހުން އޮތް ނޫސްވެރިންގެ ބައްދަލުވުމުގައި މިނިސްޓަރ ހައިދަރު ވިދާޅުވީ، ފްލެޓް ލިސްޓް އާއްމު ކުރައްވާނީ ހަފްތާ ފެށޭ ދުވަހުގެ ކުރީ ދުވަހުގައިކަމަށެވެ. އެކަމަކު އެދުވަހަކީ ކޮބައިކަމެއް، އެދުވަހުވެސް ހައުސިންގ މިނިސްޓަރ ޑރ. ޢަލީ ހައިދަރު ވިދާޅުވެފައެއް ނުވެއެވެ.