ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރުކުރަން ޖެހޭ ގޮތަށް، އެކުލަވާލާފައިވާ ޤަވާއިދަށް ޢަމަލު ނުކުރާނެކަން، ރާއްޖޭގެ އެންމެ ބޮޑު މަހުޖަނު ޗަމްޕާ މުޙައްމަދު މޫސާ (އުއްޗު) އެމްއެމްއޭއަށް އަންގަވައިފިއެވެ.

އެޤަވާއިދަށް ޢަމަލުކުރެވެން ނެތްކަމަށް އަންގައި އުއްޗު އެމްއެމްއޭއަށް ފޮނުއްވި ސިޓީގެ ކޮޕީ މީހާރު ވަނީ ސޯޝަލްމީޑިއާގައި ދައުރުކުރަން ފަށާފައެވެ. އެސިޓީގައި ވަނީ، ފައިސާ މާރުކުރުމަށް އެމްއެމްއޭއިން އެކުލަވާލު ޤަވާއިދަކީ، ފަތުރުވެރިކަމުގެ ސިނާޢަތުގައި މަސައްކަތް ކުރާ ފަރާތްތަކާއި އެކު އެކަށީގެންވާ ގޮތެއްގައި މަޝްވަރާކޮށް ޚިޔާލާއި ލަފާ ނުހޯދައި، އަދި ސިނާޢަތަށް ގެއްލުންވާ ގޮތަށް އެކުލަވާލާފައިވާ ޤަވާއިދެއް ކަމަށެވެ. އެހެންކަމުން އެ ޤަވާއިދު ވަގުތުން އުވާލަންޖެހޭ ކަމަށްވެސް އެސިޓީގައި ވަނީ ބުނެފައެވެ.

އެނގިފައިވާ ގޮތުގައި އައު ޤަވާއިދަށް އަމަލުކުރެވެން ނެތްކަމަށް އަންގައި، އުއްޗުގެ އިތުރުން އެހެން ރިޒޯޓު އޯނަރުންވެސް ވަނީ އެމްއެމްއޭއަށް ސިޓީތަައް ފޮނުވާފައެވެ. 

ރާއްޖޭގެ އެންމެ ބޮޑު މަހުޖަނު އުއްޗު އެމްއެމްއޭގެ ޤަވާއިދަށް ޢަމަލުކުރުމަށް ދެކޮޅު ހެއްދެވި އިރު، އެ ޤަވާއިދާއި އެއްގޮތަށް ޢަމަލުކުރުމަށް މިހާތަނަށް 170 ވުރެ ގިނަ ރިޒޯޓުން ވަނީ ރަޖިސްޓްރީވެފައި ކަމުގައި ސަރުކާރުން ހާމަކުރައްވާފައިވެއެވެ.